Poortukkat marluk qaartarortallit timmisartumi nassaarineqarput
- al-Qaedakkut ilisarnaataat erseqqarissorujussuupput, USA-mi naalagaaffiup isumannaatsuunissaanut ministeri nutaarsiassaqartitsivimmut ABC-mut oqarpoq.
Poortukkap aappaa printerip patronissaanut assingusumik imaqarsimavoq. Qalipaatissaanulli taarsiullugu qajuusaasanik pasinapiluttunik patroni taanna imaqarsimavoq. Poortukkap aappaa qaartuujasumik ledningitalimmik imaqarsimavoq, printeritut isikkoqarluni, TV-qarfimmit CNN-imit tamanna ilisimatitsissutigineqarpoq.
Qaartartoq tamakkulerillaqqissunit sananeqarsimasoq Dubaimi politiit uppernarsarpaat, USA-milu isumannaatsuunissamut paasisimasaqarluartut aamma uppernarsarpaat, qaartartut taamaattut qunutitsiniat atorajunnerusaraat, takujuminaatsuummata.
Arnaq qaartartumeeriniarluni pilersaarusiortutut pasineqartoq Yemenimi sakkutuut isumannaallisaasartut ullumi tigusaraat.
Yemenip illoqarfiisa pingaarnersaanni, Sanaa-mi, illut ilaanni arnaq taanna toqqoqqasoq isumannaallisaasartut paasigamikku illu ungoorpaat, taamaalillutillu tigusarisinnaasimallugu. Yemenimi præsidentip oqarnera naapertorlugu arnaq taanna al-Qaedakkunnut attaveqartuuvoq.
