Poortukkanik angisuunik nassiussineq akikinnerulissasoq
Tele-Post tusagassiuutinut nalunaarummi taama ilaatigut allaaserisaqarpoq.
Poortukkanik angisuunik nassiussineq ukiumi nutaami akikinnerulissasoq nalunaarutigineqarpoq.
Poortukkanik Kalaallit Nunaanneersunik, Kalaallillu Nunaata iluani avammullu nassiussanut akit assigiissaarneqassapput:
- Taamaalilluni apeqqutaarujussuarunnaassaaq poortugaativit qanoq oqimaatsiginera, Tele-Post taama oqarpoq.
Poortukkanik Kalaallit Nunaanni nassiussinermi poortukkanut 50 kilo angullugu oqimaassusilinnut tamanut akip tunngaviusup 91 koruuninngornissaa allannguutit ilagissavaat, ullumikkummi aki tunngaviusoq poortukkap oqimaassusaanut naleqqiullugu allanngortarmat.
Nunanut allanut poortukkanik nassiussinernut aamma taama allannguuteqartoqassasoq, Tele-Postip oqaatigaa.
Allakkat umiarsuakkoortitanut akit allannguuteqassanngillat, tassa allakkanut B-nut, allakkanulli A-nut, tassa timmisartukkoortitanut akit allannguuteqarput.
Akit Tele-Postip nittartagaani telepost.gl-imi takuneqarsinnaapput.
