Poorskikkunnut timmisartuussinernut Air Greenland isumalluarpoq
Angalasut sinerissami silap ajornera pissutigalugu kinguaattoornermik eqqugaasut, Air Greenlandimit ullumi nalunaarput.
Ilulissaniit Sisimiuniillu Kangerlussuup tungaanut ullumikkut timmisartuussisoqarsimanngilaq, Nuummiit Nuummullu timmisartuussinerit pissusissamittut, annikitsuinnarmillu kinguaattoorfiusumik, ingerlasimasut. Maniitsumut timmisartuussinissaq iluatsissimavoq, timmisartorlu maanna Nuup tungaanukarpoq.
Kulusummut arfininngormat ullumikkullu timmisartuussinissaagaluaq aamma taamaatinnarneqarsimavoq.
Diskobugtimi aamma Qasigiannguanut Qasigiannguaniillu, aamma Qeqertarsuarmut Qeqertarsuarmiillu, timmisartuussinerit silap ajornera pissutigalugu kinguaattoorfiusimapput.
Air Greenlandip timmisartorsui imarpik qulaallugu angalasartut nalunaaquttap akunnerinik marlussunnik kinguaattoorlutik Københavnimut aallarsimapput – Norsaq Danmarkip nalunaaqutaa malillugu qulingiluat missaanni tikissimavoq, Kunuunnguarlu aamma Københavnimut meqqammerluni.
Angalasussarpassuit ingerlaqqissinnaajunnaaqqasut aallarfissannik nutaanik periarfissarsiuullugit Air Greenlandimi maanna ulappupput, direktør Christian Kjeldsen oqaluttuarpoq. Timmisartuussinissat Air Greenlandip amerlisarsimavai, silallu kinguaattoortitsineranit qaavatigut maanna eqqugaapput. Silarlulli taamaaginnassappat kinguaattoorfiusumik ingerlanissaq pinngitsoorneqarsinnaanngilaq.
- Angalasussat kaammattorpavut tekst-TVkkut nittartakkatsinnilu malinnaaqqullugit, Air Greenlandimit allapput, takorloorpaallu Kangerlussuarmi utaqqisorpassuit ingiffissaqarnissaat ajornakusoorsinnaasoq.
