Pooq Qiperorlu ajugaassutigaat
Unammisitsineq Qallunaat nunaanni Det Nationalhistoriske Museumimit aaqqissuussaavoq.
Atuartullu klasselæriat tulluusimaaqaaq.
- Soorunami uanga atuartuutikka tulluusimaarutigeqaakka assorujorujussuaq, Ane Sofie Petersen ajugaasut, Nuummi Kangillinnguani 7.b-it, ilinniartitsisuat taamak oqarpoq.
Qallunaat nunaanni oqaluttualiornermik ukiut allortarlugit unammisitsisarput. Danmarkimi atuartut ukioq manna peqataanatik nunatsini atuartut kisimik unammipput.
Atuartut ajugaasut nuannaaqaat
- Ajugaagatta nuannaartorujussuuvugut niviarsiaqqat amerlanerit qiapput nuannaarnermik, uanga nammineq nuannaartorujussuuvunga. Aqagu aallaleratta massakkut nuannaaruloorpugut qilanaarsuataarpugut aallarnissatsinnut, Fiona Berthelsen Kangillinnguit atuarfiani 7.b-mi sisamanngormat KNR-mut oqarpoq.
Kalaallit Nunaat Danmarkimullu atassuteqarnera, Unammisitsinermi sammineqarpoq.
AAMMA ATUARUK Kangillinnguit Atuarfianni atuartut oqaluttuarisaaneq pillugu unammisitsinermi ajugaasut
7.b-kkut Danmarkimiinnerminni ilikkagaqarluarnissaat, Det Nationalhistorisk Museumip piareersaarsioraa, ningiua Mette Skougaard oqarpoq.
Qulequttanik marlunnik assigiinngitsunik toqqagassaqartoq Ane Sofie Petersen nassuiaavoq.
Internetsi iluaqutigaat
-Siullermik historiedysten peqataatinneqarpoq nunatsinni taava qulequttat marluk toqqarneqarsinnaagamik pooq qiperorlu imaluunniit Hans Egedep nunatsinnukaqqaarnera, atuartut Pooq Qiperorlu toqqaarpaat, Ane Sofie Petersen KNR-mut oqarpoq.
Hans Egede tassaavoq nunatsinni ajoqersuiartortitaq siulleq, Qallunaat kunngiata aallartitaa. Pooq aamma Qiperoq tassaapput Kalaallinut siullernut ilaallutik Qallunaat nunaannut tikinnikut.
Atuartut klasselæriat ilanngullugu nassuiaavoq oqaluttualiartik atuakkanik atorniartarfinni internettikkullu ujaasinermikkut naammassigaat.
