Mike Pompeop Steen Lynge ikusimmillugu ilassivaa. Assamminneq coronap tunillaassuunnerani ileqquujunnaarpoq. Assi: KNR

Pompeo Københavnimut tikittoq: Issittoq Pituffillu oqallisigaavut

Mike Pompeo Københavnimut tikeraarpoq – USA-llu nunarput pisiarinnialikkersaaqqinnavianngikkaa, taassuma neriorsuutigaa.

Issittoq, Pituffik niuernerlu.

Taakku danskit nunanut allanut tunngasunut ministeriata, Jeppe Kofodip, USA-llu nunanut allanut tunngasunut ministeriata, Mike Pompeop, ullaaq manna oqallisigisaasa ilagaat. 

Mike Pompeop Københavnimut tikikkami danskit ministeriunerat Mette Frederiksen naapippaa. Aammali nunanut allanut tunngasunut naalakkersuisoq, Steen Lynge Demokraatineersoq, savalimmiormiullu nunanut allanut tunngasunut ministeriat, Jenis Av Rana, ataatsimeeqatigai.

Taakkuali Pompeop Kofodillu tusagassiortunik aggersaanermi qaangiuteqqammertumi najuutinngillat. Taamaammat tikeraartup tikeraartitsisullu tusagassiortunit apersorneqarneranni apersorneqarsinnaasimanngillat.

 

Mike Pompeo Steen Lynge -

Assammiisarnerli coronap nalaani mutiuallaanngitsoq puigulaarsimannguatsiarpaa. Danskimmi nunanut allanut ministeriat Jeppe Kofod assamminnialeraluarpaa, Kofodilli assamminngitsiarlutik ikutsiminik ilassigaa uani takusinnaavarsi. Video: DR

 

Apersorneqartulli nunarput pillugu oqaaseqatsiarput. Mike Pompeop USA-p Nuummi juunip qaammataani sinniisoqarfeqalernera nunannaarutigigini oqaatigaa.

- USA Kalaallit Nunaanni kiisami sinniisoqarfeqaqqilerpoq, taanna oqarpoq.

AAMMA ATUARUK Lynge Pompeop ataatsimeeqatiginnginnerani: Isumaqatigiinngittoqassaaq

Pituffimmi kiffartuussinissamut isumaqatigiissut pillugu aamma oqaaseqarpoq: 

-  Pituffimmi sakkutooqarfeqarnitta sanilitsinnut, tassa Kalaallit Nunaannut iluaqutaanissaa sulissutigiuarsinnassavarput. Tamatuma oqallisigineqarnera tamatsinnut pingaarutilerujussuuvoq, Mike Pompeo oqarpoq.

83 millionit koruuninut qujanaq

USA-p Kalaallit Nunaat pisiarinnilikkersaaqqinnavianngikkaa, Jeppe Kofod oqarpoq. Taassumali USA iluatsillugu qutsavigaa, nunatsinnut 83 millionit koruunit missaannik aningaasaliiniarneranut tunngatillugu. 

USA-mi nunatsinni suliniutinut 83 millionit koruunit missaannik aningaasaliiniarluni apriilimi nalunaarpoq.

AAMMA ATUARUK Lynge qaaqqusaaneq pillugu: Pituffimmut kiffartuussinissamut isumaqatigiissut tigussavarput

- Aningaasaliissutissai 2020-mi 2021-milu atorneqassapput, aningaasallu taakku amerikamiut immikkut ilisimasallit siunnersuisullu nunatsinni aatsitassarsiornermut, takornariartitsinermut inuussutissarsiutinullu allanut tunngatillugu siunnersuinerannut atorneqassapput.

- USA-p Nuummi sinniisoqarfeqaleqqinnini suliniutinullu aningaasaateqarfinnik pilersitsinini ilutigalugit aningaasaliissuteqarnerusalertussanngornera nuannaarutigaara, Jeppe Kofod oqarpoq. 

Danmarkip USA-llu atassuteqaqatigiinnerat ataatsimiinnerminni pingaarnertut aamma oqallisigaat. 

- Danmarkimut tikeraarnerit Danmarkip USA-llu atassuteqaqatigiilluarnerannik ersersitsivoq, Jeppe Kofod Mike Pompeomut tusagassiortunik aggersaanermi aallarniutigalugu oqarpoq. 

Nunanut allanut angallanneq coronavirusip nunarsuaq tamakkerlugu tunillaassuunerani ajornakusoornalersimasoq, taassuma ilanngullugu oqaatigaa.

 -  Nunavut tamat oqartussaaqataanerannik pingaartitsilluinnartuupput. Tamanna illersortuarsinnassavarput, Mike Pompeo oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat