Politimesterip tullersortaa isornartorsiummut oqaaseqarumanngilaq

Politiit tigummigallagaat madrasiinnarmi natermiillutik ulloq unnuarlu qullermik ikumasoqartartut, videokkullu nakkutilliivigineqaannavittartut, Folketingip ombudsmandiata ullumi saqqummiuppaa.

- Tigummigallarneqartut pisariaqavitsillugu isertitsivimmiitinneqartarput, pissutsillu allat pissutaallutik isertitsivimmiitinneqarnerisa qanoq sivisutigissaat tunngaviliisuusarpoq, Morten Nielsen oqarpoq.

- Kalaallit Nunaanni isertitsiviit atorneqarnerat Folketingip ombudsmandianit isornartorsiorneqarpoq. Ilaatigut eqqaaneqarpoq Sisimiuni tigummigallarneqartoq ulluni 111-ni isertitsivimmiitinneqarsimasoq. Taamaattoqarnera Folketingip Ombudsmandiani nakkutilliisut pisortaata, Lennart Fransenip, naleqqutinnginnerarpaa.

- Ataasiakkaat pillugit oqaaseqarsinnaanngilanga, pissutsilli aalajangersimasut pissutigalugit isertitsivinniit pinerluuteqarsimasunut inissiisarfinnut inissiineq ajorpugut pinerluuteqarsimasup susimanerinik paasiniaanerup ingerlanneqarnerani, soorlu pinerluuteqarsimasutut pasineqartup pasineqaqataa aamma pinerluuteqarsimasunut inissiisarfimiippat tamanna ajornakuusuussaaq, politimesterip tullersortaa Morten Nielsen oqarpoq,

Malittarisassat siorna decembarimi ersarissarneqarput, pineqaatissinneqarsimasullu tigummigallarneqartulluuniit immikkorluinnaq ittumik isertitsivinniisinneqartassasut tassani erseqqissarneqarpoq, taakkulu siniffeqarlutik, nerriveqarlutillu issiaveqartussaapput.