Politimesterikkoorlugu suliassanngortitsineq iluaraa
Suliaq politimesterikkoorlugu suliarisassanngortinneqarpoq, Atassutikkullu tamanna iluarisimaaraluaraat pineqartut inatsisartuni sulinerminnit tunuarallarnissaannut isuma attattuarsinnarpaat. Atassutip Inatsisartuni ilaasortaatitaasa siulittaasuat Emilie Olsen taama oqarpoq.
Tamanna Siumup Inatsisartuni ilaasortaatitaasa siulittaasuannit Lars-Emil Johansenimit ima oqaaseqarfigineqarpoq:
- Naalakkersuisup siulittaasuata Hans Enoksenip ulloqeqqanut radioaviisimi tamanna pillugu tutsiunnera pingaartorujussuartut isumaqarfigaara. Eqqartuussisut, unnerluussisut, inatsisiliortullu ataatsimut katillugillusooq ulluni makkunani suppalioqqajaaneq unitsillugu naalakkersuisut siulittaasuat nalunaaruteqarpoq. Suliassaq taanna maaniinngilaq, uagut inatsisiliornermik suliaqarpugut, unnerluussisut suliassaq misissortariaqarpaat, politiit misissortariaqarpaat unioqqutitsisoqarsimanersoq, taamaattoqarsimappallu eqqartuussivimmi suliarineqartariaqarpoq. Tassa suliassaq taanna torersumik suliarineqassaaq, taassuma saniatigut aallamik piumasaqarnissaq tunngavissaqanngilaq massakkut, Siumut sinnerlugu inatsisartunut ilaasortaq, Siumukkullu ilaasortaatitaasa siulittaasuat Lars-Emil Johansen oqarpoq.
