Politimesteri: Ukiup aallartinnera sakkortoqaaq
- Qularutissaanngilaq sakkortoqimmat.
Januaarimi suliani pingasuni inuit toqunerisa, politiit toqutsinertut paasiniagaasa, kingornatigut Kalaallit Nunaanni politimesteri Bjørn Tegner Bay taama oqarpoq.
Angut 18-inik ukiulik nunaqarfimmit Sermiligaameersoq januaarip aallaqqaataani tigusarineqarpoq angummillu 42-nik ukilimmik toqutsisimasutut unnerluutigineqarluni.
Angut 48-nik ukiulik toqungasoq Tasiilami inissiami ullut marluk qaangiummata nassaarineqarpoq, inooqatigisaalu toqutsisutut sivitsunngitsoq unnerluutigineqarpoq.
AAMMA ATUARUK Tunumi toqutsisoqarnera pillugu suliat upalungaarsimasuutitat sulisinneqalerneranik kinguneqartoq
Angut 57-inik ukiulik nunaqarfimmi Niaqornani qoorortuumit aallaaneqarnermi kingornatigut toqusimasoq politiit arfininngormat nalunaarput . Pisumi tassani angut 38-nik ukiulik tigusarineqarpoq toqutsisimasutullu unnerluutigineqarluni.
- Ukiup aallartinnera sakkortusimaqaaq. Qaammatip ataatsip ingerlanerani toqutsinernik paasiniaanerit pingasut aaqqissuussaaffitsinni malunnaqaat. Soorunami eqqaamasariaqarpoq inaarutaasumik eqqartuussivimmi aalajangerneqassammat tassaanersoq toqutsineq, Bjørn Tegner Bay oqarpoq.
Naleqqiussinerit mianersuullugit
Kalaallit Nunaanni Politiivini kisitsisit naapertorlugit siorna nunami maani pingasunik toqutsisoqarpoq. 2020-mi toqutsinerit tallimaapput. Aamma 2019-mi taamaappoq.
2015-imiit Kalaallit Nunaanni toqutsinerit
2015: 4
2016: 3
2017: 6
2018: 4
2019: 5
2020: 5
2021: 3
Tigusiffik: Kalaallit Nunaanni PolitiitiDrab i Grønland siden 2015
Kisitsisinik siornarnitsanik naleqqiussinissaq mianersuunneqartariaqarpoq, politimesteri oqarpoq.
- Kisitsisimmi annikingaaramik naatsorsueqqissaarnermi nalaatsortuusinnaapput, Bjørn Tegner Bay-imiit tutsiuppoq.
Naak januaarimi suliat taakku pingasut qaammatip ataatsip iluani pisimagaluartut, imaanngilaq toqutsinerit katillutik amerlassusaat Kalaallit Nunaanni 2022-mut qanoq ittuussanersoq siulittorneqarsinnaasoq, politimesterip erseqqissarpaa.
Suliat taakku pingasut pillugit sukumiinerusumik oqaaseqaseqarsinnaanngilaq, paasiniaaneq suli ingerlammat. Kisianni Kalaallit Nunaanni nakuusernermik pinerlunnerit nalinginnaasumik assigiissuteqarput, nassuiaavoq.
- Suliani nakuusernertalinni angerlarsimaffinnilu eqqissiviilliornertalinni nalinginnaasuuvoq angerlarsimaffinni akulikitsumillu imigassartorsimanermi pisarlutik.
