Politimesteri paasiniaanialerpoq

Naalakkersuisuni ilaasortaasimasut Jens Napaattuup Rasmus Frederiksen-illu ilassinnissutinik atuisimanerat politiinit misissorniarneqalerpoq.

- Inatsisilerituut Nuna Advokatineersut Deloitte-kkunneersullu nalunaarusiaat, naalakkersuisunilu ilaasortaasimasut ilassinnissutissanit atuisimanerisa takussutissartaat tunngavigalugit, pinerluttoqarsimaneranik paasiniaanissamut tunngavissaqarluartoq naliliivugut, taama oqarpoq nunatsinni politimesteri Anders Linnet.

Anders Linnetip paasiniaanissamut tunngavissat ilisimasat Danmarkimi politiinut aningaasatigut peqquserluuteqarnernik paasiniaasartunut aamma ingerlateqqinneqartariaqarsorai, paasiniaasartut nunatsinnilu politiit qanimut suleqatigiinnissaat eqqarsaatigalugu.

Tamaattorli Anders Linnet erseqqissaavoq paasiniaaneq Jens Napaattuumik Rasmus Frederiksen-imillu unnerluussinermik kinguneqartariaqanngitsoq.

Politimestereqarfik misissuinermik aatsaat aallartitsisinnaavoq Inatsisartut misissuiniarnermut akuersaarpata, sulilu akuersaartoqanngilaq.

Inatsisartut massakkumiit akuersitinneqarsinnaanissaat imaluunniit unnerluussisoqassanersoq Namminersornerullutik Oqartussanut saaffiginnissutigineqarpoq, akineqarnissarpullu maanna utaqqiinnarput Anders Linnet oqarpoq.

Anders Linnet Inatsisartut siulittaasoqarfiannut toqqaannartumik saaffiginnissimanngilaq.

Inatsisartut allaffeqarfianni pisortaaneq Nikolaj Sørensen oqarpoq politimesterip saaffiginnissutaanik takkuttoqarsimanngitsoq.

Politimestereqarfiup nammineerluni paasiniaanermik aallartitsinialersaarnera Nikolaj Sørensen-ip akuersaarnartinngilaa oqarporlu suliassaq Naalakkersuisut akisussaanerat pillugu Inatsimmut tunngassappat politimestereqarfimmit saaffigineqaqqaarnissartik naatsorsuutigineqartoq.

Naalakkersuisut sulianut atatillugu akisussaaffiinut inatsimmi allaqqavoq, Naalakkersuisut suliaannut tunngatillugu Inatsisartut aalajangiisussaatitaasut.

Namminersornerullutik Oqartussani naalakkersuisut allattoqarfianni pisortaaneq Jørn Birk Olsen saqqummiunneqartumut oqaaserumanngilaq.

Aammattaaq naalakkersuisuni ilaasortaasimasup Jens Napaattuup Naalakkersuisuugallartullu siulittaasuata Hans Enoksen-ip oqaaseqartinniarnerat iluatsinngilarput.

Naalakkersuisuni ilaasortaasimasoq Rasmus Frederiksen nammineerluni massakkut oqaaseqarumanngilaq, tamaattorli erseqqisaatigaa politimesterip paasiniaaniarnera ajoriffissaqartinngikkini.