Politimesteri ajuusaarpoq
- Ajusaarnarpoq angutip Ilulissaneersup misigisimammagu, politiinut saaffiginnissutini oqaatsitigut ajornartorsiuteqarneq pisuulluni isumagineqarsinnaanngimmat. Kisianni taamaattoqanngilaq, taama nassuiaavoq Steen Silberg Thomsen.
- Piffissami tassani sianermat kalaallisut oqalussinnaasumik najuuttoqarpoq. Pinartumik suliaqartoqarpoq, ajuusaarnaraluartumik saaffiginnissutaanik ikiorneqarsinnaanani, tassa oqaatsinik ajornartorsiorne patsisaanngilaq tassani, politimesteri taama nassuiaavoq.
Ilulissani politeeqarfiup pisortaa Abia Ottosen radioavisimut ippassaq ilisimatitsivoq, politeeqarfimmi sulisut arfineq-pingasuugaluarlutik kisiannili sisamat ilinniartuusut, sulisut marluk allamut suliartortinneqarsimasut taamaattumillu kisimiilluni kalaallisut oqalussinnaasuni qallunaamillu ataatsimik suleqateqarluni.
Tassunga nassuiaammut tunngatillugu Steen Silberg Thomsen oqarpoq, taama nassuiaateqarneq nammineq ilisimasaminut naapertuutinngitsoq.
- Erseqqissaatigissavara Ilulissani kalaallisut oqalussinnaasut arfineq marluk sulisorineqarmata, taakkulu arfineq marluusut kalaallisut danskisullu oqalussinnaapput. Ilumoorpoq politiit marluk Paamiunut Nuummullu sivikitsumik suliartorallartinneqarsimasut. Kisianni taakku peqannginnerat pissutigiinnarlugu Ilulissani ima ajornartorsiortoqartiginngilaq allaat sulisut amerlassusaannik allanngortiterissariaqalissalluta, taama aamma oqarpoq Steen Silberg Thomsen. Aamma politiinik kalaallinik atorfinitsitsinissamik amerlassusiliilluni oqarneq ilumuunnginnerarpaa, tassa oqartoqarmat kalaallisut oqaasilinnik arfineq-pingasunik atorfiit inuttaqartussaagaluartutnik.
Steen Silberg Thomsen oqarpoq, aamma tassani paatsoortoqarsimassasoq.
- Sumiluunniit politiinik atorfinitsitsinermi qassit marlunnik oqaaseqarnissaannik imaluunniit qassit danskiunissaannik piumasaqaateqartoqarneq ajorpoq. Taamaallaat anguniartussaavarput atorfinitsitsinermi periaaseq 80/20. Atorfinittut 80 procenttii nunaqavissuussapput isiginiarneqarnerli ajorput marlunnik danskisuinnarluunniit oqaaseqarnersut, politimesteri Steen Silberg Thomsen taama naggasiivoq.
