Naalakkersuisooqatigiit nutaat Politikkikkut suleqatigiissinnaasut aajuku

Partii Naleqqap naalakkersuisooqataajunnaarnera politikkikkut ikkussuisariaqarnermik ilaatigut kinguneqarpoq. Kim Kielsen ikkussortakkanik ikkussuinissaminut arlalinnik periarfissaqarpoq, Kim Kielsenilli Siumumit ikkussortagaatai aamma naammagutinngitsoorsinnaapput.

Partii Naleraq qaammatini sisamani naalakkersuisooqataareerluni sapaatiummat peqataajunnaarmat Kim Kielsen naalakkersuisuni nutaanik suleqatissarsiortariaqalerpoq.

Naalakkersuisut siulittaasuat Partii Naleqqap peqataajunnaarneratigut naalakkersuisooqatigiinni ikinnerussuteqalerpoq.

 

 

Kim Kielsen naalakkersuisuni ikinnerussuteqaraluarluni ingerlaannarsinnaavoq, tamatumanili arlaannik naammassisaqarniaraangami illuatungiliuttunit taperserniarneqaqqaartuaannartariaqassaaq.

Periarfissat nutaat

Naalakkersuisut siulittaasuat siulittaasuuginnassalluni nutaamillu naalakkersuisooqatigiiliornissamut periarfissanik misissuissalluni KNR-imut sapaatiummat oqaatigaa.

Periarfissallu naalakkersuisooqatigiinnik amerlanerussuteqartunik pilersitsisinnaasut kajuminnartut uani marluupput. Kim Kielsen qinersisoqannginnerata siuliani IA suleqatigaa tamannalu nangeqqissinnaavaa. Uanilu 18-inik isersimasuutitaqalersinnaavoq.

 

 

Inuit Ataqatigiilli ataatsimooqatigilernissaanut Kim Kielsen akuereqqaagassaqarpoq. Tassa aalisarnermut inatsimmut mittarfinnullu pilersaarutinut tunngatillugu akuerisassaqartoq, Inuit Ataqatigiit siulittaasuata, Sara Olsvigip KNR-imut sapaatiummat oqaatigaa. Tamatumalu saniatigut Kim Kielsenip aqutseriutsini allanngortillugu Siumut iluani eqqissiviilliortoqannginnissaa qulakkiissavaa.

Periarfissat aappaattut, Kim Kielsenip qinigaaffiup kingulliup aallartinnerani suleqatigisani tassa Demokraatit suleqatigileqqissinnaavaa. Taamaattoqassappallu Siumut Demokraatillu 16-inik isersimasuutitaqalissallutik.

 

 

Demokraatilli suleqatiseriumanissaanut atatillugu Demokraatit piumasaqaateqarnissaat Kim Kielsenip naatsorsuutigisinnaavaa. Qinersisoqareerneratami kingorna isumaqatigiinninniarnermi Demokraatit piumasaqaatigisatik suli attatiinnaraat, Demokraatit siulittaasuata, Niels Thomsenip KNR-imut sapaatiummat oqaatigaa.

Tamatumani ilinniartitaanermut inuussutissarsiuteqarnermullu tunngatillugu ilaatigut akuerisassaqarpoq akileraarutillu appartinneqarlutik inuit aningaasanik tigusassaqarnerutilerneqassasut, Niels Thomsenip nassuiaatigaa.

Kielsen peqataatinnagu amerlanerussuteqartut

Kim Kielsenilli ikkussortakkat kisimi ikkussuiniarsinnaanngilaq. Illuatungiliuttummi maanna atuuttut Siumut avaqqullugu suleqatigiinnissamik isumaqatigiissuteqarsinnaapput.

Inuit Ataqatigiit, Demokraatit Atassullu 16-inik isertitaqarlutik amerlanerussuteqalersinnaapput, Suleqatigiissitsillu peqataatinneqarnerisigut ilaasortamik ataatsimik ilaneqarsinnaallutik. 

Inuit Ataqatigiit, Demokraterne og Atassut kan sammen samle et flertal på 16 mandater og få et ekstra mandat med ved at invitere Samarbejdspartiet med.

 

 

Partiit saamerlerniittut Inuit Ataqatigiit talerperlerniittullu Demokraatit suleqatigiissinnaanerannik pilersitsinnginnermi susassaqarfiit isumaqatigiissutigisinnaasaat ujartorneqaqqaartariaqarput. Partiit taakku marluullutik aalisarnermut inatsimmut mittarfinnillu sanaartornissamut apeqqummi imminnut ungasippallaanngillat.

Illuatungaanili uranimut apeqqut isumaqatigiissutiginngilaat. Tamatumalu saniatigut politikkiminni aamma assigiinngillat. Inuit Ataqatigiit isumaginninnermi sillimmasiinissamut aningaasalersuiniarput inooqataaniarnikkullu ajornartorsiutit aaqqiissuteqarusullutik. Demokraatillu akileraarutikinnerutitsillutik inuussutissarsiornermi pissutsit pitsaanerutilerusuppaat.

Isummersuutit

2018-10-12_14_10_56-inatsisartut-ukiakkut-ataatsimiinnerat-001.png

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat