Politikkikkut oqaaseqartarneq assortuussutaavoq

Qaasuitsup Kommuniani borgmesterip Assartuussinermut Isumalioqatigiissitaliap inassuteqaataanut isumaqataanani sisamanngormat oqariartuutaa kommunimi suleqatigiinnit amerlanerussuteqartunit apeqquserneqareersorli Qaasuitsup Kommuniani Siumup gruppianit qisuariarfigineqarpoq.
Jess Svane
maajip 24-at 2011 05:24

Taakkua erseqqissaatigaat borgmesteri, ikinnerussuteqaleraluaruniluunniit, qinigaaffik tamaat borgmesteritut, kommunit aqunneqarnerannut inatsit najoqqutaralugu, atasinnaatitaammat:

- Imaappoq borgmesteri uppitinneqarsinnaanngilaq aamma oqaaseqartitaasinnaajunnaarsinnaanngilaq inatsisinik unioqqutitsisimanngikkuni. Taamaattumik allanik gruppinik amerlanerussuteqartoqaliinnarnera pissutigiinnarlugu borgmesterip oqaaseqarsinnaajunnaarsimaneranik isummertitsiniaaneq eqqoranilu ippinnartorujussuuvoq, Ove Berthelsen oqarpoq.

Borgmesterip Qaasuitsup Kommunia sinnerlugu oqariartuuteqarnera ilaatigut Peter Olsenimit Inuit Ataqatigiinneersumit apeqquserneqareersoq, Siumup gruppia taama nalunaaruteqarpoq.

Peter Olsenili paatsoorneqartutut misigisimavoq:

- Borgmesterip oqariartuutai imatut isigineqassanngimmata, tassa Qaasuitsup Kommuniani kommunalbestyrelsi taamatut isumaqartoq. Kisianniliuna borgmesterip nammineq taanna isumaa. Aamma borgmesteri qanorluunniit oqaaseqarusukkuni isumaqarsinnaatitaavoq. Taanna oqaatigiinnarpara. Imaanngilaq isumaqatiginnginnakku imaluunniit isumaqatigigakku, Peter Olsen oqarpoq.

Taanna tusagassiutinut nalunaarummini ilaatigut allappoq borgmester Jess Svanep Assartuussinermut Isumalioqatigiissitap inassuteqaataanut isummersuutai pimoorullugit tiguneqartariaqanngitsut.

Taava Jess Svane avammut oqariartuuteqalinnginnermini suleqatigiinnut isumasiueqqaartassava?

- Naamik. Taamatut isumaqanngilaq taanna. Kisianni kommunalbestyrelsi sinnerlugu oqaaseqarniarutta isumaqarpunga kommunalbestyrelsip aalajangigai aammalu akuerisimasai tunngavigalugit oqaaseqassagaanni, kommunalbestyrelse sinnerlugu oqaaseqartoqartariaqartoq, Peter Olsen oqarpoq.

Qaasuitsup Kommuniani kommunalbestyrelsimi ataatsimik amerlanerussuteqarlutik Inuit Ataqatigiit, Atassut, Demokraatit aamma Kattusseqatigiit Partiiat inissisimapput. Siumut borgmesteriutitaqartoq ataatsimik ikinnerussuteqarluni qulinik kommunalbestyrelsimi ilaasortaatitaqarpoq.