Politikkikkut naliliisartut: IA-p tutsuginassusia innarleqqavoq
Uranimut Nunatta naaggaarluinnarnerata allanngortinneqarsinnaaneranik, Ove Karl Berthelsenip oqarsimanera, IA-mi tunuliaqutaasunit itigartilluinnarneqarpoq.
- Ove Karl Berthelsenip oqariartuutaa isumaqatiginngilluinnarparput, IA-p politikikkut oqaaseqartartua, Aqqaluaq B. Egede, sapaatip-akunnerata siuliani oqarpoq.
Politikkikkullu naliliisartup, cand.polit.-ip Jakob Janussenip qularutiginngilaa, Aqqaluaq B. Egede apeqqummut matumunnga partiip iluani tapersersorteqarnerussasoq:
- Uanga qularinngilluinnarpara Aqqaluaq B. Egede avammut saqqummernermi IA sinnerlugu nukeqarnerusutut saqqummersoq. Eqqaamassavarput Ove Karl Berthelsen Inatsisartunut qinersisoqarmat qinigaanngimmat, Aqqaluaq B. Egedelu taaguunneqangaatsiartorujussuulluni.
- Tamatuma kingorna partiimi politikkikkut siulittaasup tulliatut inissippoq, aammalu Inatsisartut ataatsimiinnerini annertoorujussuarmik partii sinnerlugu aquttutut isigisariaqarluni, politikkikkut naliliisartoq Jakob Janussen oqarpoq, nangillunili ima oqarluni:
- Atorfilittani aqqutigalugit nalunavianngilaa taakkua aatsitassat qaqutigoortut qanoq annertutigisumik aningaasarsiornikkut aqqutissiuisinnaasut, taamaattumillu partiip isummeqqaarnerata nikiseriarnissaanik taamaalilluni oqarnianngilanga ussernartorsiulersinnaasoq, kisianni takusinnaagaat taakkua periarfissat massakkut iluaqutiginianngikkaanni Nunatta tapiissutinik ataatsimoortunik sillimmateqarnera aqaguagukkut taamaatinnavianngitsoq, Jakob Janussen oqarpoq.
Aatsitassat uranitallit pillugit Ove Karl Berthelsenip oqaaserisaasa Naalakkersuisut iluanni pissutsinit tunuliaqutaqarsinnaasut, Jakob Janussenip aamma oqaatigaa, Demokraatimmi isumaqarput Nunatta uranimut naaggaarluinnarnera allanngortinneqartariaqartoq.
Taamatuttaaq urani pillugu IA-mi isumaqatigiinngittoqaannassappat politikimik ineriartortitsinissaq kinguaattoorfiusinnaasoq, politikkikkut naliliisartoq Sten Lund isumaqarpoq:
- Tutsuiginassuseq taanna attanneqassappat partiip iluani oqallinnerit assigiinngitsut soorunami ingerlanneqartariaqarput, aamma taamatut oqariartuutit parnaaqqavallaamik oqariartuutigisarniaraanni politikkimik ineriartortitsinissamut kinguarsaataasutut oqaatigineqarsinnaavoq, politikkikkut naliliisartoq Sten Lund oqarpoq.
Jakob Janussen isumaqarpoq IA-p urani pillugu siunnerfia allanngorallarnavianngitsoq, tamannali siunissami allanngorumaartoq, Issittumi pissutsit pillugit ilisimatusarsimasup Damien Degeorgesip oqaatigaa:
- Urani pillugu politikki allanngortinneqassanersoq allanngortinneqassannginnersorluunniit maanna apeqqutaavoq, siunissarli eqqarsaatigalugu tamanna akissutissarsineqarumaarpoq, Inatsisartunimi amerlanerussuteqartut isumaqarput Nunatta uranimut naaggaarluinnarnera allanngortinneqartariaqartoq, Damien Degeorges, Issittoq pillugu ilisimatusarsimasoq oqarpoq.
Demokraatit tusagassiutinut nalunaarummi ullumi ima allapput:
"Ove Karl Berthelsenip aatsitassat qinngornernik ulorianartunik, uraninik akoqanngivinniissaannik manna tikillugu politikkeqarnerup oqallisaaqqilernera ersarissumik ingerlateqqilermagu, kiisalu Nunatsinnut iluaqutissartaqarpat taamatut politikkeqarnerup allanngortinneqarsinnaaneranik oqarnera Demokraatinit nuannaarutigaarput.
Aatsitassat qaqutigoortut Kuannersuarniittut piiassagaanni aamma urani, uranimut naaggaarluinnarnermi killigititaasunit annerusoq, ilanngullugu piiarneqartariaqarpoq.
