Politikkikkut naliliisartoq: Siumut siumukarunnaartutut nalilerneqarsinnaavoq
Ukiuni kingullerni 30-ni naalakkersuinikkut siuttuusimasut partii Siumut illuatungiliuttunngorput, taakkualu qasusoorsimasutut naliliisartup nalilerpai.
Namminersorluni Oqartussaanerup eqqunneqarneratigut Jakob Janussenip maluginiakkani ima oqaatigai:
- Qallunaat naalakkersuisuisa imaluunniit ministeriisa isumaat atuuttussaannartut isigiunnaarlugit aamma nammineerluta siunnersortissatsinnik atuisalernikuuvugut aammalu erseqqisartarlugu nunat taama assigiinngitsigisunik aallaavillit soqutigisaat tamatigut assigiittuaannarsinnaanngitsut, Jakob Janussen oqarpoq.
Qinersinerup kingorna partii Siumut illuatungiliuttunngorpoq qinersisartuisalu ikilisimannerannut patsisaasorisani Jakob Janussenip ima oqaatigaa:
- Siumut ukiuni taama amerlatigisuni naalakkersuisunik pilersitsisarsimalluni qasusoortutut ilaatigut nalilerneqarsinnaasoq isumaqarluinnarpunga, nutaanillu isummersuisussanik katersuuffiusinnaasunik partiimik peqanngippallaarpoq. Inuit ataasiakkaat isummertarnerat apeqqutaanerulernikuuvoq. Inuit assigiinngitsut assiginngitsunik isumallit tamaasa tikilluaqqullugit partiimut ilaasortanngortiterneratigut partiip qanorpiaq sumillu tunngaveqarnera erseqqarlunnerusutut uanga isigilernikuuara, Jakob Janussen oqarpoq.
