Politikkikkut ataatsimiinneq nuannisarnertalik
Danskit qinikkat ilisimaneqarluartut soorlu Mogens Lykketoft aamma Pia Kjærsgaard peqataapput.
Inatsisartut siulittaasuata, Lars-Emil Johansenip, naapeqatigiinnermi siunertaq nuannersumik iluatsilluartutut naammassineqartutut nalilerpaa.
- Siunertaavoq ikinngutigiinneq, suleqatigiinneq, ilisarisimaqatigiinneq nuannersumillu danskit kalaallillu inatsisartoqarnerani tamanna ingerlanneqarpoq, Lars Emil Johansen KNR-imut oqarpoq.
Taassuma oqaluttuaraa danskit tikeraat Nunatta oqaluttuarisaaneranik siulittalu inooriaasiannik saqqummiifigineqarsimasut.
Aqqaluk Lynge oqaluttuartinneqarpoq
Atuakkiortoq, politikkeriusimasoq ICC-milu siulittaasuusimasoq, Aqqaluk Lynge angakkut angakkorsartarnerlu pillugit oqaluttuarpoq.
Arktisk Stationimi pisortaq, Ole Stecker, arferit pillugit silallu allanngoriartornera, tamatumalu imartatsinnut qanoq sunniuteqarnera pillugu misissuinerit pillugit taassuma kingorna saqqummiussivoq.
Naapeqatigiinnermi saqqummiinerinnaanngilaq. Tikeraat aamma Qeqertarsuup avannaanut takornariarput.
Nuannaariarnerunngilaq
Inatsisartut Folketingillu siulittaasoqarfiisa naapeqatigiinnerat nuannaariarnerinnaanersoq Lars Emil Johansen aperaarput.
- Tassami nuannaartarpugut kisianni nuannaariarnerunngilaq. Pingaartorujussuuvoq nuannaaqatigiilluni misigisaqaqatigiinneq. Oqaluttuarisaanitsinnut tunngasunik itisuumik immitsinnut immersortarpugut. Tamanna pingaaruteqarpoq, Lars Emil Johansen, danskit kalaallillu qinikkat naapeqatigiinnerat pillugu oqarpoq.
Pia Kjærsgaardip, Dansk Folkepartimeersup, Nunatsinnut angalanini nuannaarutigeqaa:
- Kalaallit Nunaat ulluni makkunani tikeraarlugu nuanneqaaq. Politikeritullu ikinngutigiinnerput pingaartipparput, tassami Folketingip siulittaasoqarfia Inatsisartut siulittaasoqarfiat ilulissani ataatsimeeqatigaa, Pia Kjærsgaard oqarpoq.
