Politikkikkut ajortussarsiorneq ingerlaginnarsinnarpoq
Anda Uldumip Demokraatineersup ullumi Partii Inuit toqqaannarlugulu siulittaasuat Nikku Olsen sakkortuumik isornartorsiorpai. Naalakkersuisooqatigiinnik Partii Inuit teknikkikkut suleqateqarunnaarnerata kinguneranik tamanna pissuteqarpoq.
Partii Inuit Siumumik Atassummillu suleqateqarunnaarnerat Uldumip paasisinnaanngilaa. Nikku Olsen oqaluttuarpoq, naalakkersuisooqatigiit Demikraatinik teknikkikkut suleqateqalersimanerat pissutigigitsik, tamannali Anda Uldumip silatusaarnerusorisinnaanngilaa. Akerlianilli tunngavilersuutigineqarsinnaasut allarpassuit taakkartorlugit.
- Naalakkersuisooqatigiinnik tapersuerusunnginnitsinnut Demokraatit tunngavissarsiuisinnaapput. Naalakkersuisooqatigiit siunissaq ungasinnerusoq eqqarsaatigalugu pilersaaruteqanngillat, aningaasaqarnikkut politikkerisami neriuutigisat allallu piviusunngorsinnaanngitsut tunngavigineqarput piviusullu tunngavigineqaratik, naalakkersuisooqatigiit aamma inuiatigiit iluaqutissaat eqqarsaatigeqqaarnagit imminnut qanigisaminnillu isumassueqqaartoqartarpoq, Anda Uldum sakkortuumik appisaluussivoq.
Siumumi ilaasortat partiillu allat Aleqa Hammondimik salluneraaqattaarnerat aamma ilannguppaa.
- Isumaqarpunga, Nikku Olsenip Demokraatit tunngavilersuutiginiannguarlugit namminneq –naalakkersuisooqatigiittulli - uppernassuseqanngitigisut. Taamatut oqareerlunga Partii Inuit illuatungiliuttunut tikilluaqqussavakka, pissanngatigaaralu taamatut inissilluni suliassaq qanoq naammassiniassaneraat, Anda Uldum oqarpoq.
