Politikki Naalakkersuisunit allanngortinneqarpoq
Copenhagen Business Schoolimi Issittumi Aningaasarsiornermut lektorip, Lise Lyckip isumaa naapertorlugu aningaasaqarniarnerup ilorraap tungaanut aallartinniarneranik, inuttaasunullu atugassarititaasut pitsanngorsarniarlugit maanna Naalakkersuisuusut neriorsuutitik sapinngisartik atorlugu timitalerniarsaraat:
- Aningaasartuutissanut missingersuusiatik malilluarniarsaraat, inuiaqatigiinnilu atugassarititaasunut pisussaaffigisatik naammassiniarlugit. Aningaasartuutissanummi missingersuutit siornatigutut sipporujussuarneqassaarput, Lise Lyck aviisimi ullormut saqqummersartumi Informationimi oqarpoq. Information Kalaallit Nunaat nutaaq pillugu ulluni makkunani sammisaqarpoq.
Kalaallit Nunaata aningaasaqarniarneranut politikerit kanngunartuliorneri qangali tusagaqarfigaavut, politikkiallumi inersimarpalaalersimavoq, Lise Lyck oqarpoq.
Aamma qallunaat politikerii nunatsinnut tunngasunik malinnaasutoqqat tassunga assingusunik oqaaseqarput.
- Kalaallit Nunaanni naalakkersuisunngortut ilami aamma Siumukkormiut illuatungiliuttunngortut tamarmik inuusussiallassimasutut ipput. Politikkikkummi unammilleqatigiinnerat naligiinnerulersimavoq, Mogens Lykketoft Socialdemokratineersoq oqarpoq.
Aamma Dansk Folkepartip Kalaallit Nunaat pillugu oqaaseqartartuata Søren Espersenip allanngortoqarsimanera malugisinnaalluarnerarpaa.
- Namminersulernissaq isumaqatigiinniutigineqarmat Kuupik Kleist qallunaat politikeriisa nuannaartorilluinnarpaat. Nunamut piginnittussaaneq iluatsikkamiuk torrallaalaavissorpoq, Søren Espersen oqarpoq.
- Tassa kalaallit politikerii namminersornerunerup nalaani piviusorsiorpalaanngitsut atuukkunnaarlutik maanna naalakkersuisuusut nutaamik siunnerfeqalerput, Søren Espersen naggasiivoq.
