Politikerit uuliasiornissanut ilisimasaqarnerulissapput
Naak uuliamik ujaasilluni qillerinernut akisussaaffik, Namminersorlutik Oqartussani Aatsitassanut Ikummatissanullu Pisortaqarfimmiikkaluartoq, ujaasinerit aamma kommunimut angisuumik piumasaqaatitaqartut paasinarsivoq. Taamaattumik Kommunalbesyrelsip Aasianni immikkut sammisaqarluni ataatsimiinnissaa aalajangiunneqarsimavoq, tassami Aasiaat Qeqertarsuup Tunuata eqqaani ujaasilluni qillerinerni ukiormanna aamma tulaassuivigineqartussaammat.
Kommunalbestyrelsimi ilaasortat ilaatigut umiarsualivimmut takuniaassapput, tamaanilu ujaasilluni qillerinissanut pilersaarusiornermut, sillimaniarnermut, avatangiisinut kommunillu isumagisassaannik paasissutissinneqassallutik.
Tamatuma saniatigut imaani nunamilu uuliasiornermut atatillugu suliaqarnermi suliniummik kommunalbestyrelsimut ilaasortat paasissutissinneqassapput, tamannaammammi uuliamik ujaasinermut atatillugu nunami inuussutissarsiorneq pillugu kommunimit piumasaqaateqarfiusussaq.
Kommunip imaani uuliamik ujaasinermut siunnersortaa Cowi Greenland, kommunalbestyrelsimi ilaasortanut suliniummik saqquummiissaaq taaneqartumik . Aamma sulianut atatillugu kommunimi upalungaarsimanissamut tunngasoq nutartigaq politikerinut saqqummiunneqassaaq, taaguuteqartoq Offshore Onshore.
Naggataatigut oqartussat suliassaat, kommunip tigummisai sammineqassapput.