Politikerit teknikkikkut periarfissanik ilisimaatsut
Nunatsinni politikerit inuusuttutulli periarfissanik nutaanik soqautiginnittuuppata innuttaasut kommunenit Namminersorlutillu Oqaartussanit ilarunerusumik sullinneqarsinnaassangaluarput. Assersuutigalugu Qaasuitsup Kommuniani immikkoortortaqarfik ataaseq matullugu teknologi nutaaneq atorlugu innuttaasunut qanilaarluni sullissisoqalersinnaavoq.
- Allatut oqaatigalugu sullissinermi IT pisortanit atorluarneqarnerusinnaavoq. Siulliutillugu kommunet pillugit aalajangersakkat sukumiisumik misissorneqassapput. Innuttaasunik sullissiviit kiisalu allaffeqarfiit eqaannerusumik naammassissaqarnerusalersinnaassasut ilimagaara. Tamanna sipaarniarnermi periusaasinnaavoq, pingaarneruvorli pissutsit tamanut isertuunneqaratik saqqumisumik ingerlannissaat, kiisalu innuttaasut politikerillu pisariunnginnerusumik atassuteqaqatigiissinnaanissaat, Demokraatit sinnerlugit Inatsisartunut qinigassanngortoq, Allan Chemnitz oqarpoq.
Kalaallit Nunaanni innnuttaasut amerlaqisut IT pillugu tunngaviusumik piginnaanerit amigaatigaat. Tamanna ilinniartitsinikkut, paasititsiniaanikkut ilinniartitaanikkullu piaarnerpaamik iluarsiniarneqassaaq, iluatsillugu politikerit piginnaanngorsarnerni siuttuutillugit. Taamatut politikerit innuttaasullu pingaarutilinnik piginnaaneqalernissaat qulakkeerniarneqarsinnaavoq sullissinerlu pitsanngorsarneqarsinnaalluni.
- Kommunet kattussornerat eqqartorneqarnikuuvoq, Qaasuitsup Kommuneatalu agguataarneqarnissaa ilumoorullugu oqallisigineqarluni. Tamanna uanga kukkunertut isigaara. Inuuttaasut ujartugaat tassaapput politikerinut qaninnerulernissartik, sukkanerusumik sullinneqarnissartik kiisalu tusaaneqarnissartik. Piumasaqaatit naammaginarput, kommunelli aggualunnerisigut, annertusaanikkut imaluunniit naammassisaqarnerulersitsinikkut iluarsineqarsinnaanatik. Taamatut inuiaqatigiinni aningaasatigut sipaartoqarsinnaavoq. Anguniakkat amerlaqisut teknikkikkut periarfissat atorluarnerisigut iluarsiissuteqarfigineqarsinnaapput, Allan Chemnitz isumaqarpoq.
