Politikerit sullitassatik puigorlugit imminnuinnaq pipput

- Isumaqarpunga maannakkut politikerit suliatik aallukkaluarlugit kisianni imminnut sullinnertik ilaatigut siulliutippallaaluatsiartaraat, akunnerminni aaqqiagiinngissutitik iluminni oqaloqatigiissutissarigaluatik salliutillugit inuiaqatigiinnut apuussorlugit isumaqatigiinngissutsiminnik nittarsaassisarneri kusananngitsumik qineqqusaartutut nalilerneqarsinnaapput nalligeqqusaarnertut nipeqarlutik. Inuiaqatigiit iluanni naalakkersuinikkut suliassat tunulliuttutut ilersaramikkit, inuiaqatigiit ingerlaasiannik naliliisartoq Steen Lund taama naliliivoq.

Taassuma assersuutigai demokraatit. Taakkumi oqaatsit nuannerpallaanngitsut akunnerminni apuuttaqattaarpaat.

- Naluara pisariaqavinnersoq taamatut oqallittarnissaq taakkua inuiaqatigiinnut sullissisutut tatigineqarnissamut qullarsaataanngivimmata. Aamma politiinik akulerussuinissaq inissaminiinngitsutut ippoq, tassami politiit suliassaqareeqaat ajornartorsiutinik annertunerusunik inuiaqatigiit iluanni, Steen Lund oqarpoq.

Aperaarput qanoq politikeqartoqartariaqaraluarnersoq.

- Suliassarivaat inuiaqatigiinni suliassat siulliullugit aallutissallugit, soorlu inuuniarnikkut ajornartorsiutit, aningaasatigut unammilligassat inuiaqatigiinni atuuttut tamakkua qanoq aaqqinniarneqarnissaat suliassarivaat

Steen Lund aamma erseqqissaavoq politikkikkut sulinermi immikkoortinneqartariaqartut politikkikkut suliat aammalu inuttut tigusinerit.

- Isumaqarpunga politikkikkut sullissiniaraanni inuiaqatigiinni taava eqqarsaatigilluartariaqartoq, arlaatigut isornartorsiorneqaraanni immikkoortissinnaasariaqarput politikkikkut isornartorsiorneqarneq taavalu inuttut isornartorsiorneqarneq. Maannakkut ilaatigut malunnartarpoq isornartorsiuinerit inuttut tiguneqaqqajaavallaartartut, taannalu sulinermut annertuumik aserorsaataasarpoq, taama oqarpoq Inuiaqatigiit ingerlaasiannik naliliisartoq, ilisimatusarfimmi allaffissornikkut ingerlatsinermut ilinniarsimasoq Steen Lund.