Politikerit soqutigisaat pillugit ammanerunissaq ujartorpaa

Politikerit suliffeqarfinnik piginneqataaffeqarpata, paasissutissat taakkununnga tunngassuteqartut innuttaasunut ammasumik saqqummiunneqartarnissaat,Inuussutissarsiornermut Aatsitassarsiornermullu naalakkersuisup Ove Karl Berthelsenip kissaatigaa, siunnersuullu partiinit tamanit tapersersorneqarpoq.
Allattoq Mads Lynge
apriilip 28-at 2011 07:32

Alcoa aluminiumik Maniitsup eqqaani pilersaarutit malillugit aatsitsiviliorsinnaalissagaluarpat, Ove Karl Berthelsenip suliffiutaa assartuussisoq, Kamma ApS, assartuussinissamut piareeqqavoq. Soqutigisanik taamannak akuleriissitsineq mianernarsinnaasoq, politikkikkut malinnaasoq Sten Lund isumaqarpoq.

Qinikkat soqutigisatik pillugit ammanerunissaat, Ove Karl Berthelsenip Radioaviisimi apersorneqarluni ilaatigut kaammattuutigaa, partiillu tamarmik siunnersuummik tapersersuipput.

- Arlaannarpulluunniit Naalakkersuisunut ilaasortaalissagaluarpat siulersuisut ilaasortaaffigisat sumiluunniit ingerlatsinermi ilaasortaaffigisat tunuttarpavut, naalakkersuisuunerlu tamakkiisumik aallutarilertarlugu. Naalakkersuisooqatigiinnit tamanna aamma attanneqarnissaa kaammattuutigerusupparput, Siumup siulittaasua Aleqa Hammond oqarpoq.

Siunnersuut Atassummiit aamma tapersersorneqarpoq.

- Atassumminngaanniit isumaqatigaarput, ammasuunissaq ujartoratsigu. Soqutigisaqarsimagaanni imaluunniit arlaatigut suliffeqarfimmik piginneqataaffeqarsimagaanni aamma tamakku saqqummersinneqarnissaat, Atassutip siulittaasua Gerhardt Petersen oqarpoq.

Demokraatit aamma tapersersuipput. Qinikkammi tutsuiginassusaat pingaaruteqartoq, politikkikkut oqaaseqartartup, Niels Thomsenip, oqaatigaa:

- Isumaqarpunga pingaaruteqartoq ersarissassallugu qinersisartut apeqqusersorsinnaassanngikkaat politikkikkut suliaqartut ataasiakkaat sulinerminni suut aallaavigalugit sulinersut, Niels Thomsen, Demokraatineersoq, oqarpoq.

Kattusseqatigiit Partiiata siunnersuut tunngaviusumik isumaqatigaa, paasissutissalli ilumut saqqummiuttariaqarnersut, Inatsisartunut ilaasortap, Knud Fleischerip apeqquteqaatigaa:

- Ilaatigut ukiorpassuarni nunaqarfinni fabrikkit matoorarneqarsimasut ilaannik ammaaniarnitsinni peqataasimanera aamma sunut tamanut saqqummiullugu pisariaqarnerpara, aammalu apeqquserneqartariaqarnerpoq suleqataarusulluni Nunatsinnilu siuarsaaqataarusulluni tamakkuninnga ingerlatsiniarneq ilumut inerteqqutaaleriartussanersoq qinigaaneq pissutigiinnarlugu. Tamanna uanga akuerisinnaanngilara, Knud Fleischer oqarpoq.