Politikerit qinikkat atorfillillu akeqanngitsumik angalaqqittarput

Politikerit Namminersornerullutillu Oqartussani atorfillit angalagaangamik bilitsiisanik bonusinik taasagaannik pissarsisarput, taakku katersorneqartarput amerligaangatalu nunanut allanut akeqanngitsumik angalaqqissinnaanermik kinguneqartitsisarput.

Tassa imaappoq, Namminersornerullutik Oqartussat akiligaanik politikeri atorfililluunniit angalasoq, akeqanngitsumik nunanut allanut ingerlaqqissinnaavoq timmisartumi akisunermi issialluni, akeqanngitsumillu SAS-ip hoteliutaani najugaqarsinnaalluni.

Aasaq juunimi tamanna aamma radio aviisimi ilanngutassiaraarput, Namminersornerullutillu Oqartussat pisortaanerannit neriorsorneqarpugut, aasaanerani feeriarneq qaangiuteriarpat iliuuseqarfigineqarumaartoq.

Aatsaallu oktoberip 13-iani Namminersornerullutik Oqartussat qullersaqarfia SAS-imut allannguinissamik allagaqarsimavoq.

- Ulloq manna tikillugu SAS-imut qinnutigisarsimagaluarparput Namminersornerullutik Oqartussat akiligarimmassuk, ajornanngippat Namminersornerullutik Oqartussaniit angalanitsinni ataatsimoortumik atorneqarsinnaaneri pillugit allagaqarluta qinnutigalutigu, eqaannerusumik atorneqarsinnaanerat apeqqutigalutigu, Kaj Kleist oqarpoq.

Namminersornerullutik Oqartussani pisortaaneq Kaj Kleist nassuiaavoq, suliffimmut atatillugu angalanerit kiisalu privatimik angalanerit bonuseqartitsinermi taputartuunneqartarsimammata, immikkoortinnissaat ajornakusoortarsimasoq.

Kaj Kleist aperaarput tamakku Danmarkimi aaqqilertorneqarsinnaasarmata sooq Namminersornerullutik Oqartussat taamak ajornakusoortitsiginersoq.

- Siornatigut misilittarsimagaluarparput, SAS-i ilaatigut isumaqatigiissutiginiarlugu. Kisianni ajoraluartumik suliffeqarfittut suli iluatsissimanngilarput. Neriuppunga uuma allakkiap maannakkut nutaamik erseqqissumillu apeqquteqaateqarfiusup pitsaanerusumik aaqqiissutissamik aqqutissiuussinnaassagaa, Kaj Kleist oqarpoq.

Taanna aamma nassuiaavoq aasaanerata kingorna allanik ilaatigut artukkiingajattunik suliassaqarnini pissutigalugu aasaq radio aviisimut neriorsuutini, tassa aasaanerata kingorna iliuuseqalersaarnini piffissaqarfigisimanngikkini. Taamatuttaaq SAS-i akissuteqartinnagu inerneranik oqaaseqarsinnaannginnerarpoq.

Kaj Kleist nammineerluni suli eurobonusisarnermut ilaasortaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat