Politikerit - pingaartumillu Siumukkormiut - pillugit ajortunik nikanarsaasunillu aviisit allaaserisaqartalerput
Radioaviisimi aaqqissuisunngortussaq, Johannes Mathiassen, atuartartutut uissuumminartumik uparuaavoq, politikerit, pingaartumillu Siumukkormiut, pillugit aviisit ajortunik nikanarsaasunillu allaaserisaqartalernerat uparuarlugu.
- Aviisit ajortunik allaaserisaqartalersut isumalluarsaariunnaarsimasut isumaqarpunga. Politikerit, pingaartumillu Siumukkormiut, nikanarsarnissaat kisiat anguniarparsi. Tusagassioriaasersi kusananngilluinnartutut isumaqarfigaara, Johannes Mathiassen AG-mut aqagu saqqummersussamut oqarpoq.
Taama oqarnermini ilaatigut eqqarsaatigaa, Naalakkersuisunut ilaasortaasimasumut, Jens Napãtûmut tunngassuteqartut. Aningaasanik ilassinnissutissanik atuivallaarsimanini pissutigalugu Jens Napãtôq aasaq’manna tunuarniuteqartariaqarsimavoq.
-Jens Napãtôq pasipilussarniarparsi. Nakkutilliisussat suliaminnik sumiginnaasimapput, Radioaviisimi aaqqissuisunngortussaq aviisimut AG-mut oqarpoq. Johannes Mathiassenip aamma apeqquserpaa, aningaasanik ilassinissutissanik atuivallaarsimanermi unioqqutitsisoqarsimanersoq.
Johannes Mathiassen Radioaviisimi aaqqissuisunngornissami tungaanut Siumumi allattaanertut atorfeqassaaq.
