Politikerit oqallorissassapput

Politikerip oqariartuutiginiakkani saaffigisanut qanoq pitsaanerpaamik oqaatigisinnaavaa? Tamatumunnga akissutissaq Inatsisartut siulittaasuata Josef Motzfeldtip Inatsisartuni ilaasortanut qanittukkut ingerlateqqinniarsaraa.
Allattoq Elisa Isaksen
apriilip 16-at 2010 09:36

Josef Motzfeldt Inatsisartuni ilasortat oqallorissarnermik pikkorissarnissamut qaaqquai, Inge Baaring Copenhagen Business Schoolimeersoq pikkorissaasorissallugu.

Pikkorissartitsinermi ilaatigut oqalulluni attaveqaqatigiinnermut tunngaviusumik piumasaqaatit saqqummiusseriaatsillu timip pissusilersorneri aallaavigalugit sammineqarput. Pikkorissarnermilu peqataasut pissarsilluarnerarput.

- Tusarnaartunut tusagassiorfinnullu oqaaseqartarnitsinni qanoq periaaseqarnissatsinnik qanorlu iliorluta Inatsisartut oqaluttarfianniit oqaaseriniakkat pitsaanerpaamik saqqummiunneqarsinnaanerannik annerusumik ilisimasaqalerpugut, Justus Hansen Demokraatineersoq iluarisimaarinneqisoq oqarpoq.

Naalakkersuisunut ilaasortaq Maliina Abelsen aamma iluarisimaarinnippoq.

- Pikkorissartitsisorput pikkoreqaaq. Suleqatigiikkuutaarluta ilaatigut sulivugut paasiuminartumillu oqariartuuteqarsinnaaneq ilinniarlugu, Maliina Abelsen oqarpoq.

Oqallorissarnermi peqataasut pissarsiaqarluarnerat tunngavigalugu, ukiamut taamaaqataanik pikkorissartitsisoqarsinnaanera anguniarneqarpoq.