Inatsiseqarnermut ministereqarfillu isumaqatiginninniarneq ukiortaamili aallartippoq, arlaleriarlunili kinguartinneqartarluni. Ilaatigut Danmarkimi coronavirusimik maanna ajornartoorneq peqqutigalugu.Assi: Steen Brogaard, FT / KNR edit

Politikerit: Nunatsinni nakkutilliisut akissarsiaat qangalili qaffatassaagaluarput

IA sinnerlugu Siumullu sinnerlugu Folketingimi ilaasortat nunatsinni aalajangersimasumik suliffeqarlutik pinerluuteqarsimasunut inissiisarfinni nakkutilliisut akissarsiaasa qaffanneqartussanngornerat nuannaarutigaat. Maannamut assigiinngisitsisoqarnera tassa naammaleqaaq, Aki-Matilda Høegh-Dam oqarpoq.

Kattuffiit politikerillu ukiorpaalunni tamaviaarutigereeraallu nunatsinni aalajangersimasumik suliffeqarlutik pinerluuteqarsimasunut inissiisarfinni nakkutilliisut akissarsiaasa qaffanneqarnissaat qulakkeerneqarpoq.

Nunatsinni pinerluuteqarsimasunut inissiisarfinni nakkutilliisut akissarsiaasa qaffannissaannut ukiunut sisamanut katillugit 38,4 millionit koruunit atorneqarnissaat, danskit naalakkersuisuisa Siumumit Inuit Ataqatigiinniillu folketingimut ilaasortanut kiisami isumaqatigiissutigaat.

AAMMA ATUARUK 38,4 millioner kroner mere til anstaltbetjentes løn

Inuit Ataqatigiillu sinnerlugit Folketingimi ilaasortap, Aaja Chemnitz Larsenip, tamanna nuannaarutigaa.

Pinerluuteqarsimasunut inissiisarfinni nakkutilliisut akissarsiaannik qaffaanissaq

38,4 millionit koruunit 2020-mit 2023-mut ukiut tamaasa 9,6 mio. koruuninut agguataarneqarput.

Isumaqatigiissut naapertorlugu aningaasani taakkunani nunatsinni pinerluuteqarsimasunut inissiisarfinni nakkutilliisut pillugit isumaqatigiinniarnissani qaffaataajumaartunut ilanngaataassanngillat

Paasissutissanik pissarsiffik: Inatsiseqarnermut ministereqarfik, Siumut aamma Inuit Ataqatigiit

- Nunatsinni pinerluuteqarsimasunut inissiisarfinni nakkutilliisut akissarsiaasa qaffannissaannut ukiuni sisamani tulliuttuni tamani 9,6 millionit koruuninik immikkoortinneqarnissaasa nuannaarutiginissaa maanna pingaarnerpaavoq, Aaja Chemnitz Larsen KNR-imut oqarpoq.

- Ukiullu sisamat taakkua qaangiunnerini tamatuma atuuttuarnissaata qulakkeernissaata tamaviaarutiginissaa tullernguuppoq.

Ukiortaamili isumaqatigiinniartut

Folketingimi ilaasortat Inatsiseqarnermut ministereqarfillu isumaqatigiinniarnerat ukiortaamili aallartippoq, arlaleriarlunili kinguarsarneqartarluni. Ilaatigut Danmarkimi coronavirusimik maanna ajornartoorneq tamannali aamma sioqqullugu Siumut IA-llu nunatsinni inatsiseqarnermut susassaqarfimmut immikkoortitat 50 millionit koruunit missaanniittut qanoq agguataarnissaannik isumaqatigiigunnaarmata kinguarsarneqartarpoq.

Nunatsinni Pinerluttunik Isumaginnittoqarfimmi sulisut Kalaallit Nunaanni Politiinut sanilliullutik Danmarkimi suleqatitillu akissarsiaasa nikingassuteqarneroqinerat, nassuiaammi siorna ukiakkut saqqummiussami erserpoq.

AAMMA ATUARUK Aaja: Pineqaatissinneqarsimasunik nakkutilliisut akissarsiaat ilinniagaallu pitsaanerulerlik

Ingammik nunatsinni pinerluuteqarsimasunut inissiisarfinni nakkutilliisut Danmarkimi suleqatiminnit akissarsiakinneroqisut erserpoq.

Taamaattumik aningaasat immikkoortitat 80 procentii nunatsinni pinerluuteqarsimasunut inissiisarfinni nakkutilliisunut immikkoortinneqassasut IA-mit Siumumillu aalajangerneqartoq, Aaja Chemnitz Larsen oqarpoq. 

- Imaanngilaq taakkua salliukkivut, taakkuali pillugit taama isumaqatigiippugut, Aaja Chemnitz Larsen oqarpoq.

Nunatsinni pinerluuteqarsimasunut inissiisarfinni nakkutilliisut pillugit isumaqatigiissut naapertorlugu nunatsinni politiit akissarsiaasa qaffannissaannut 10,8 millionit koruunit sinnerupput. Kisianni Inatsiseqarnermut ministereqarfiup tamatumunnga atatillugu isumaqatigiissutissatut siunnersuutaa pillugu isumaqatigiittoqarsinnaasimanngilaq.

Siumut: Assigiinngisitsisoqarnera tassa naammaleqaaq

Siumut sinnerlugu folketingimi ilaasortap Aki-Matilda Høegh-Damip tamanna aamma nunnaarutigaa. 

- Aningaasat immikkoortitat siunertamut atorneqarnissaat maannamullu assigiinngisitsinerup qaangiunnissaa qulakkeerumallugit isumaqatigiinniarnitta torersumik naammassinissaa pingaartippara, Aki-Matilda Høegh-Dam oqarpoq.

AAMMA ATUARUK Inissiisarfinni paarsisut aningaasarsiaqarnerulersinnaanerat nuannaarutigineqartoq

- Nunatsinni pinerluuteqarsimasunut inissiisarfinni nakkutilliisunut tunngatillugu sivisuumik isumaqatigiinniareerluta aningaasat qanoq atorneqarnissaannik isumaqatigiippugut. Inatsiseqarnermut ministereqarfillu isumaqatigiinniarnerput nangissavarput, nunatsinnilu politiit pillugit taamatulli angusaqarluarfiutigisumik isumaqatigiissuteqarnissarput pimeerpara.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat