Politikerit nalunaarutigineqarnerat suli aalajangiiffigineqanngilaq

Politikerit nuimasut Siumumeersut sisamat, pisortat aningaasaataannik atornerluisimasutut politiinut nalunaarutigineqarnerat tunngavigalugu politimestereqarfik suli misissuivoq.
Allattoq Najaaraq Egede
juunip 05-at 2009 09:32

Nalunaarutigineqartut tassaapput naalakkersuisut siulittaasorisimasaat Hans Enoksen, siornatigut Inatsisartuni siulittaasoq Jonathan Motzfeldt, siornatigut naalakkersuisunut ilaasortaq Jørgen Wæver Johansen aamma siornatigut naalakkersuisunut ilaasortaq Tommy Marø.

Vicepolitimester Morten Nielsen killiffik pillugu ima oqarpoq:

- Tunngaviusumik misissuinerit aallartereerpavut. nalunaarut nalunaarummilu paasissutissat innersuunneqartut misissorneqareerpata itinerusumik misissuinissarput aalajangissavarput, Morten Nielsen nassuiaavoq.

Politikerit eqqartuussivitsigut malersorneqarnissaannut tunngavissaqarnersoq imaluunniit suliaq unitsinneqassanersoq paasiniarlugu politiit misissueqqinniarput.

Misissugassatilli suunersut oqaatigerusunngilai, suliamut taamaattumut tunngatillugu politiit piffissaqarluarlutik peqqissaartumillu sulisariaqarmata.

- Misissuinerit suut ingerlanneqarnersut tusagassiuutitigut tusarneqartariaqanngillat, Morten Nielsen erseqqissaavoq.

Taassuma oqaatigaa naatsorsuutigisinnaallugu suliakkiissutip qanoq ingerlaqqinnissaanut aalajangernissamik tungaanut sapaatip-akunneri marluk suli ingerlasinnaasut.

Politikerit nuimasut ilassinninnermut aningaasaliissutinik atornerluisarnerat aviisimi Atuagalliutini allaaserinneqattaarnerit tunngavigalugit innuttaasut naammaginninngitsut ilaat ullut qulit matuma siornagut politiinut nalunaaruteqarpoq.