Politikerit isumannaallisaaneq misissoqquaat
SF-it, Socialdemokraatit Dansk Folke Partiillu maanna piumasaraat inissiisarfimmi isumannaallisaanerit misissoqqissaarneqassasut.
2009-p ingerlanerinnaani Risskovimut inissinneqarsimasut 19-it qimaapput, qaammatinilu kingullerni pingasuni, kalaallit inissinneqarsimasut qulit qimaasimapput - maajip sisamaanni marluk, tallimanngormat marluk kiisalu arfininngornerup sapaatillu unnuaani arfinillit.
Danmarkimi nunap immikkoortuini isumaginninnermut tarnikkullu nappaatinut ataatsimiititaliap siulittaasuata Flemming Stenildip isumannaallisaaneq sakkortusarusuppaa. Taanna Ritzauimut ima oqarpoq:
- Tamanna akuerineqarsinnaanngilaq qimaasoqartarneralu taamaatinneqartariaqarpoq. Taamaattumik nunap immikkoortuini isumannaatsuunissaq misissuiffigineqarpoq - illuutinut immikkoortortanilu sulisunut tunngasut ilanngullugit, Flemming Stenild oqarpoq.
