Politikerit inuit akornanni qinngarsuinermik tinnersaassanngillat!

Taama sakkortutigisumik ilaatigut allappoq, Partiit Inuit siulittaasuata tullia, Randi Broberg, tusareerlugu Inuit Ataqatigiit Inatsisartuni ilaasortaatitaata, Naaja Nathanielsenip ammip qalipaataanik immikkoortitsisarnerup sakkortusiartuinnarneranik allaaserisaqarnera.

Randi Brobergip ammip qalipaataa pillugu immikkoortitsineq allaqqunneqarsinnaanngitsutut isigippagu aamma politikerisut qisuarianrnera eqqarsaatigaanni, taama akuerineqarsinnaanngilaq. Taama isumaqarpoq politikki pillugu oqaaseqartartoq, Daniel Thorleifsen.

- Ammip qalipaataa malillugu immikkoortitsineq pineqarpat, taanna akuerineqartussaanngilaq assuarineqartussaallunili! Politikerillu immikkoortitsinissamik tinnersaalissappata tamanna sakkortuumik uparuarneqartariaqarpoq, Daniel Thorleifsen oqarpoq.

Partii Inuit siulittaasuata tullia, Randi Broberg ippassaq radioaviisimut oqarpoq, nunasiaataasimanerup kinguneranik, inuiaat kalaallit naqisimaneqarnermik misigilersimasut, taamaattumillu kalaallit pisinnaatitaaffigigaat imminnut illersornissaq.

- Isumaqarpunga inuiannguit taama ikitsigisut, misigisimasullu naqisimaneqarlutik imminnut illersorniarlutik pisinnaatitaaffigigaat.

- Aamma inunnik allanik nikanarsaanikkuut?

- Inunnik allanik nikarnarsaanerunngilaq, kisiannili imminut illersorniarluni naqisimaneqarnerullu atorunnaarsinneqarnissaanik angusaqarniarnermi nikanarsarneqarnerullu kinguneranik ataqqineqarnererulerniarnermik qanoq iliuusiuvoq, qallunaaluarnerunani, Randi Broberg oqarpoq.

Tassa taassuma allaqqunneqarsinnaanngissoraa naqisimaneqarnermik misigisimanerup pilersissimmagu ammip qalipaataanik immikkoortitsineq.

Soorunami ammip qalipaataanik immikkoortitsineq pinngitsoorneqarsinnaavoq, politikki pillugu oqaaseqartartoq, Daniel Thorleifsen oqarpoq imalu nangilluni.

- Politikerit imaanniartussaagaluarput, aaqqiissutissanik tikkuartuillutik aaqqiissutissanik nassarniassallutik. Tikkuartuiniaannarneq atorsinnaanngilaq. Isumaqarpungalu politikeriuniaraanni aaqqiissutissanik siunersuuteqartarnissaq pisariaqartoq. Ingammik una ajornartorsiut eqqarsaatigalugu.

Aaqqiissutissallu ilagaat, uangut inuiattut immitsinnut qiviaqqaarnissarput, Daniel Thorleifsen oqarpoq.

- Akaareqatigiinnermik pilersitsiniarutta aamma misigisimasoqassappat imminnut minnerutinnermik, taava uatsinnut nammineq qiviaqqaartariaqarpugut immitsinnullu kivilluta, allanut akeqqersulerata. Tamannalu qaangerniarutsigu paasisimasaqassusitta ilinniarsimassusittalu qaffassarneqarnissaa pisariaqavippoq. Tassami uangut nammineersimasinnaassuserput upperilinngikkutsigu immitsinnut upperilersinnaanngilagut.

Politikki pillugu oqaaseqartartoq, Daniel Thorleifsen taama oqarpoq.

Ulloqeqqanut radioaviisimi ilanngutassiami, politikikkut oqaaseqartartoq, Daniel Thorleifsen oqaaseqartereerippullu, Randi Broberg tusagassiutinut nalunaarummi naatsumi erseqqissaavoq, akuerisinnaanagu Daniel Thorleifsenip qallunaaluartuunerarmani.

- Uanga ammip qalipaataanik immikkoortitsisuunngilanga, ammillu qalipaataanik immikkoortitsinissamik tinnersaarinngisaannassallunga. Randi Broberg allappopq nangillunilu.

- Daniel Thorleifsenip soorlu nammineerluni paasisinnaassangaluaraa oqaluttuarisaanermik inuiaqatigiilerinermillu sammisaqartuulluni naliliisartuullunilu, sunarpiaq pineqarnersoq, Randi Broberg allappoq imalu nangilluni allalluni.

- Inuiaat kikkulluunniit naqisimaneqarsimasut sulilu nunaminni minnerusutut misigisimasut, tupinnartortaqasinnaanngilaq kamassaqassappata, kamassarlu taanna paattoornikkut ammik qalipaataanik immikkoortitsinertut taaniarneqartuarpoq, Randi Broberg ilaatigut allappoq.

Daniel Thorleifsen apersorneqarnermini Randi Brobergip qallunaaluarneranik oqaaseqaranilu Brobergip qallunaaluartuunera oqaaseqarfiginngilaa, ammilli qalipaataa pillugu immikkoortitsineq isornartorsiorlugu nalinginnaasumik oqaaseqarluni.