Politikerit Hollandimeersut nunatsinnut tikeraalerunarput
Politikerit nuimasut nunatsinnut tikeraartussat tulliit Hollandimeersuussannguatsiarput. Naalakkersuisut siulittaasuata Hans Enoksenip hollandimiut naalakkersuisui nunatsinnut tikeraarsarniarpai, taamaalilluni puisit amiinik isiginnittaasiannik sunniiniarfigissagamigit.
Sermitsiaq.gl.-mi tamanna atuarneqarsinnaavoq.
Tikeraartissaq kinaassanersoq suli aalajangiivigineqanngilaq, Hans Enoksenilli nittartakkamut oqaatigaa, tikeraarti tassaassasoq naalakkersuisunut ilaasortaq nuimasoq. Tikeraartissamik qaaqqusinissaq pissaaq naalakkersuisut siulittaasuata Nunavumi naalakkersuisut siulittaasuannik Poul Okalik-mik peqateqarluni EU-mut ukiamut angalanissaanut.
Tikeraarsaanermi anguniarneqartussaavoq hollandimiut puisit amiinut isiginnittaasiat nunatsinnullu eqquinerloqisoq iluarsiiviginiarneqarnissaa. Puisit amii Hollandimut ukiuni makkunani eqquteqqusaanngillat, apeqqutaaginnarporli hollandimiut isiginnittaasiat allanngortinneqarsinnaassanersoq. Hollandimiut puisit amiinut tunngatillugu pitsaasumik isiginnilernissaat naalakkersuisut siulittaasuata Hans Enoksenip isumalluarfigisorujussuuaa, isumaqarami nunatsinni inuuniarneq piniariaaserlu allaanerujussuusut.
- Takusinnaavara Angela Merkelip Kalaallit Nunaannut tikeraarnera nunatsinni innuttaasunut iluaqutaasoq, taamaalilluni avatitsinniit qanoq inooriaaseqarnitta ersarinnerusumik paasineqarnissaanut aqqutissiueqataammat, Hans Enoksen Sermitsiaq.gl.-mut. taama oqarpoq.
