Politikerit Hawaiimut paasisassarsiulerput

Politikererit pingasut kuffertiminnik poortuinertik naammassereerlugu Hawaii-imut paasisassarsiornissaminnut piareerput. Tassani meeqqeriviit qanoq ingerlanneqarnersut paasiniassavaat, meeqqanullu ukioqanngitsuniit arfinillit tikillugit ukiulinnut ilinniartitseriaaseq isumassarsiorfigissallugu.

Politikerit Hawaiiliartussat tassaapput Naalakkersuisunut ilaasortaq, Tommy Marø, Siumut, Kultureqarnermut Ilinniartitaanermullu Ataatsimiititaliap siulittaasua, Juliane Henningsen, Inuit Ataqatigiit, taavalu ataatsimiititaliami ilaasortaq, Jens B. Frederiksen, Demokraatit. Februaarip ulluisa arfineq-pingajuanni aallarunik Kalaallit Nunaannut februaarip ulluisa 20-anni utissapput.

- Ukioqanngitsuniit arfinilinnut ukiulinnut tunngasuni aaqqissuusseqqinnerup Kalaallit Nunaata Danmarkillu avataanni nutaanik ilisimasaqarfiulernissaa pingaarutilerujussuuvoq. Hawaii oqaluttuarisaanikkut –kulturikkut kalaallinut arlalitsigut assigiissuteqarmat Hawaiimi Universiteti paasisassarsiorluni angalanermi ornitassatut toqqarneqarsimavoq, Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik ilisimatitsissummini allappoq.

Pisortaqarfiup aamma ilanngullugu oqaatigaa, Hawaiimi Universitetimik toqqaanermi peqatigitillugu siunertaasoq, ukioqanngitsuniit arfinilinnut ukiulinnut tunngasuni aaqqissuusseqqinnermik Atuarfitsialammik aaqqissuusseqqinnermut atassuserneqarnissaa, Hawaiimi ilinniartitsinermi tunngaviit ingerlaluartut sulinermi atorneqartut sammillugit.

Angalaqatigiit Hawaii-mi meeqqeriviit aamma University of Hawaii pulaassavaat.