Nakkutilliisoqarfiup ilaasortaasalu paasissutissanik saqqummiussinissaa kommunip piumasaraa. Assi: KNR / Malik Brøns

Politikerit arlallit: Paasissutissat amigarput

Ineqarnermut suliaq pillugu paasissutissat amigartut politikerit arlallit isumaqarput. Taakku Nakkutilliisoqarfimmut paasissutissanik tamakkiisunik saqqummiusseqqusipput.

Suliaq pillugu aalajangiussat immikkuualuttortai tusagassiutinut nalunaarutigineqaqqaarput. Aalajangiussani 14-iniusuni Kommuneqarfik Sermersuup Nuummi innuttaasunut inissaqartitsiniarnermini periuserisimasaa isornartorsiorneqarpoq.

Kingornalu aalajangiussanut taakkununnga 14-inut tunngavilersuutit Nakkutilliisunit tusagassiortunut saqqummiunneqarput, taakku saniatigut quppernerit arfinillit atorlugit suliap ingerlasimanera aamma nassuiarneqarluni.

AAMMA ATUARUK Ineqarneq pillugu suliaq: Aningaasaqarnermut ataatsimiititaliaq suliani arfinilinni ukiuni tallimani qaangiinnarneqartoq

Namminersorlutik Oqartussat Nakkutilliisoqarfiata ilaasortai novembarimili ineqarneq pillugu suliamik naaliliimmata paasissutissat atorneqartut tamakkiisuunngillat.

Politikerit arlaqartut piumasaqarput Nakkutilliisut paasissutissanik amerlanernik saqqummiussaqartariaqartut.

Ineqarnermut suliaq novembarimi ukioq kingulleq aallartimmalli politikkikkut arlalitsigut kinguneqarpoq, Kommuneqarfik Sermersuumiinnaangitsoq aammali Naalakkersuisuni.

Nakkutilliisoqarfiup isornartorsiuinera pissutigalugu Asii Chemnitz Narup (IA) aningaasaqarnermut naalakkersuisutut tunuarpoq.

Taanna Nakkutilliisoqarfimmut paasissutissanik amerlanernik perusuppoq, namminerlu allakkanik takunnissinnaatitaanermut qinnuteqarsimalluni KNR-imut oqaatigaa.

KNR-i aamma allagaatinik takunnissinnaanermik aamma qinnuteqarpoq. Allagaatinik takunnissinnaanermut piumasaqaat suliarineqaleruttortoq Nakkutilliisoqarfiup allattoqarfia KNR-imut paasissutissiivoq.

Ineqartitsineq inatsisinut naapertuutinngitsoq

Suliffeqarfiit namminersortut inissiaataanik attartornermik isumaqatigiissutit ukiuni arlalinni atuuttussat atorlugit kommunip Iserit aqqutigalugu innuttaasunut inissianik attartortitseeqqittarsimanera Nakkutilliisoqarfimmit novembarip qulingiliuaani unitsinneqarpoq.

Illoqarfimmi inissianik nutaanik amerlanernik pissarsinermi kommunimiit 2015-imili periuserineqalerpoq. Periuserli taanna kommunip ileqqoreqqusaanut naapertuutinngitsoq Nakkutilliisoqarfik inerniliivoq.

Attartornissamut isumaqatigiissutit atuuttut piffissami sivisuumi atuuttussaammata, periuserineqartoq kommunip karsianut millionerpassuarnik suli naleqassaaq. 2020 assersuutigissagaanni attartukkat ukioq taanna 11 millionit koruuninik naleqarput, ukioq manna 17 millionit koruunit atorneqassapput aappaagulugu 27 millionit koruunit atorneqassallutik.

Kommunimi ilaasortat akineqarnissaminnik utaqqipput 

Nakkutilliisoqarfiup paasissutissanik amerlanernik tunniussinissaa kommunimit aamma utaqqineqarpoq. 

Tunngavilersuutilli Nakkutilliisoqarfimmit novembarip 22-ani nassiunneqartut naammanngillat.

Nalunaarusiaq Nakkutilliisoqarfiup aalajangernermini tunngavigisaa paasissutissallu allat borgmesterip Charlotte Ludvigsenip ilaatigut piumavai. 

Borgmesteri Demokraatinik Siumumiillu isornartorsiorneqarpoq, tunuarnissaalu piumasarineqarluni.

AAMMA ATUARUK Demokraatit borgmesteri tunuartikkusuppaat - taamaanngippat namminneq tunuassapput

Kommuneqarfik Sermersuumi Inuit Ataqatigiit aamma Naleraq suleqatigiinnissamik isumaqatigiissuteqarlutik kommunalbestyrelsimi amerlanerussuteqarput. Kommunalbestyrelsimi ataatsimiinneq ineqarnermut suliaq pillugu oqalliffiungaatsiartoq qaangiummat Ken Madsen Naleqqamiit oqaaseqarpoq, Nakkutilliisoqarfiup paasissutissaatai sukumiisumik misissoqqaartinnagit borgmesterimik suleqateqarnertik naliliivigisinnaanngikkallaritsik nassuiaavoq.   

- Paasissutissat Nakkutilliisoqarfimmeersut amigaatigaavut. Borgmesterip Nakkutilliisoqarfimmut paasissutissanik piumasaqarnissaa ippassaq piumasaraarput. Taakku pereerutsigut borgmesteri kommunalbestyrelsip immikkut ittumik ataatsimiinnissaanut aggersaajumaarpoq.

- Pappilissat tamaasa pigutsigit eqqartumik aalajangiisinnaalerumaarpugut. Suleqatigiippugut suliarlu tamaat tamakka paasiniarparput, Ken Madsen novembarip 24-ani kommunalbestyrelsemi ataatsimiinnerup kingorna KNR-imut taama oqarpoq.
 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl