Politikerit aningaasarsiorneri qulaajaaffigineqalerput

Nunatsinni politikkerit aningaasarsiorneri kikkunnit tamanit ilisimaneqalernissaat, suliniaqatigiiffiup pinngitsaaliissutaassasoq anguniarpaa. Politikerit aningaasarsiornerminnik paasissutissiissarnerat nammineq kajumissuseq naapertorlugu maanna immersorneqarsinnaavoq.

Inatsisartuni Naalakkersuisunilu ilaasortat 39-usut akornanni taamaallaat 20-t suna suliffiginerlugu aammalu aningaasarsiutiginerlugu allattorsimaffimmut Inatsisartut nittartagaaniittumut immersuisimapput. Taamaaliortussaatitaaneq qaammatit sisamat matuma siornatigut atuutilersinneqarpoq.

Suliniaqatigiiffiup Transparency Greenlandip taamaaliortarneq nuannaarutigigaluarpaa, taamaattorli.

- Nammineq kajumissutsimik immersuisussaatitaanerup ajoqutigivaa immersuinngitsoorneq kikkunnit tamanit maluginiarneqartarmat. Nammineq kajumissutsimik immersuisoqartarnissaa ajunngikkaluarpoq, ajunngitsussarmi eqqarsaatigalugu tamanna piviusunngortinneqarpoq, Transparency Greenlandip siulittaasua inatsisileritooq, Anders Meilvang oqarpoq.

Nammineq kajumissutsimik immersuisarnerup atorneqanngippallaarnera eqqarsaatigalugu,  allatut aaqqiisoqartariaqartoq Transparency Greenlandip siulittaasua Anders Meilvang isumaqarpoq.

- Taamaattumik ilaasortat aningaasarsiornerisa pinngitsoorani allattorsimaffimmiilernissaanik peqqussusiortoqarnissaa siunnersuutigaarput, Anders Meilvang oqarpoq.

Inatsisartuni Naalakkersuisunilu ilaasortat 20-t namminneq kajumissutsiminnik immersuisimanngitsut ilaat sisamat Radioaviisimit ullaatungaani paasiniaavigaagut:

Harald Bianco Inuit Ataqatigiit, Knud Kristiansen Siverth K. Heilmannilu, Atassut kiisalu Aalisarnermut Naalakkersuisoq Ane Hansen, Inuit Ataqatigiit, tamarmik oqaatigaat immersuinissaminnut piffissaqarsimanatik taamaattorli ilisimatitsissutigalugu immersuiumaarlutik aammalu piaaralutik immersuisimanatik oqaatigalugu.

Taakku utoqqatsissutaat ajoriinnagassaannginnerami?

- Ilaasortat tamarmik immersuisussaatitaanerannut siunnersuut tamanit malinneqalertuuppat tamanna ajunngivissagaluarpoq. Sianerfigineqarlutik oqartapata soorunami taamaaliussamaarlutik, tamanna akueriuminaappoq. Apeqqutaaginnarlerporlu qaammatialuit qaangiuppata sianerfigineqaqqikkunik oqarnissaat suli immersuisimanatik, tamannami akueriuminaassaaq, Anders Meilvang oqarpoq.

Taassuma aamma neriorsuutigaa pisoq malinnaaffigilluassagamikku.

Siumup Inatsisartuni ilaasortaatitaat tamarluinnagajammik immersuisimanngillat,

Kristian Jeremiassen aamma Malik Berthelsen eqqaassanngikkaanni Siumup Inatsisartuni ilaasortaatitaat tamarluinnagajammik immersuisimanngillat.

Akissarsissutiginagit suliffiit, soorlu siulersuisuunerni ilaasortaaffiit,  immersugassami amigaataanerat  Siumup siulittaasuata Aleqa Hammondip aviisimut Atuagagdlliummut qaammatialuit matuma siorna taakkartorpaa, tamaattoqannginneralu naammaginnginnerarlugu.

Taama tunngavilersuineq atorsinnaanngitsoq Anders Meilvangip oqaatigaa:

- Namminneq kajumissutsimik immersuisussaatitaanerummat immersuisimannginneq utoqqatsissutaasinnaanngilaq,Transparency Greenlandip siulittaasua inatsisileritooq, Anders Meilvang oqarpoq.

Transparancy Greenlandimi sulisut aamma isumaqarput politikerit aappaasa aningaasaqarneri nalunaarsorneqartariaqartut, assersuutitut taavaat Kuupik Kleistip aamma Ove Karl Berthelsenip aappaasa suliffeqarfimmi GreenGemsimi siulersuisunut ilaasortaanerat.