Siumumi politikerit nuimasut pingasut 800.000 koruunit nalingannut aalisariutisinissaminnut Namminersorlutik Oqartussanit tapiiffigineqarsimasut Sermitsiaq.AG-p allaaseraa.Assi: KNR

Politikerit aalisariutissaminnut tapiiffigineqarsimanermik misissorneqaqqunera taperseraat

Politikerit nuimasut pingasut aalisariutissaminnut katillugit 800.000 koruuninik tapiiffigineqarsimanertik pillugu isornartorsiorneqarput. Suliap ingerlarngata misissuiffigineqaqqunerat taakku taperserpaat.

Suliap qanoq ingerlasimanera misissussallugu ajunngilluinnarpoq.

Inatsisartuni ilaasortat pingasut Siumumeersut Nikkulaat Jeremiassen, Henrik Fleischer Karl Kristian Kruselu taama isumaqarput.

- Inuup kialuunniit qinnuteqarnissamut naammassinnissinnaasup pisinnaatitaaffigivaa taamatut sumilluunniit qinnuteqassalluni. Umiatsiaannaanngillat Nunatsinni periarfissat taamaattut. Aamma kukkusimasutut misigisimannginnama taamaaliorniarunik taamaalioriannguarlik, aalisarnermut naalakkersuisuusimasoq Nikkulaat Jeremiassen oqarpoq. Taanna naalakkersuisuunermini qaleralinnik aalisapilunneq pillugu nassuiaatinik akerleriinnik paasissutissiisimanini pissutigalugu naalakkersuisuuffimminit siorna tunuarpoq.

Politikerit pingasut aalisariutisinissaminnut taperneqarsimanerat Inatsisartuni illuatungiliuttunit isornartorsiorneqartu Sermitsiaq.AG allappoq.

AAMMA ATUARUK Tusagassiuutit: Politikerit pisortanit tapiiffigineqarlutik aalisariutersisut

Suliallu ingerlarnga Transparency International Greenlandimit misissorneqarnissaa kaammattuutigineqarpoq.

Misissuisoqarnissaalu Inatsisartut aalisarnermut ataatsimiititaliaani siulittaasup Henrik Fleischerip taperserpaa.

Suliaq arlallit suliaraat

- ESU-p nammineq atorfilittaasa kikkuugaluarnerpullu kikkut akuerineqassanersut akuerineqassannginnersut aamma siunnersortit KNAPK-miittut, Namminersorlutik Oqartussat ataani siunnersortaasut taakku malitassatik malillugit siunnersuisarput.

Misissuineq suliamut misissuititserusuttut namminneq akilissagaat, Siumumi siulittaasup tullia, aamma aalisarnermut naalakkersuisuusimasoq Karl Kristian Kruse isumaqarpoq.

AAMMA ATUARUK Peqquserluttuliornermik nakkutiginnittut: Aalisariutitaarnissamut tapiissutit suliarineqarnerat misissortariaqarpoq

- Pisariaqanngitsumik misissuinermi aningaasat atorneqartartut, neriuppunga taakkua misissuititsinissamut kissaateqartut eqqunngitsumik pasilliuteqartitsiniarnermut misissuititsineq namminneq akilertikkumaaraat, Karl Kristian Kruse oqarpoq.

Inatsisartut aningaasarsiaat angallasissutigissallugit naammanngillat

Nikkulaat Jeremiassen taperneqarsimanngikkaluarunik aalisariummik nutaamik nammineerluni pisisinnaasimanaviarani oqarpoq.

- Inatsisartunut akissaatit hurraartuutissaanngillat aammalu taama angitigisumut angallammut, soorlu 700.000-it tungaanut ingerlasumut naleqarpata inatsisartuni akissarsiat akilersuutigineqarsinnaanngillat, Nikkulaat Jeremiassen oqarpoq.

Inatsisartuni ilaasortat ukiumut suli akileraartinnatik 484,990 koruuninik aningaasarsiannik isertitaqarput. Tassa qaammammut 40.000 koruunit missaat. Inatsisartulli ataatsimiinnerini ullormusiaqartinneqarlutillu aamma ineqartinneqartarput.

Henrik Fleicher tapiissutinik 2016-imi qinnuteqarnermini Inatsisartunut suli ilaasortaalinngilaq.

Inatsit unioqqutinneqarsimanngitsoq Karl Kristian Kruse, Nikkulaat Jeremiassen Henrik Fleischerilu Sermitsiaq.AG-mut oqarput. Tamarmik aalisarnermik inuussutissarsiuteqaramik taperneqarnertik ajortussaqannginnerarpaat.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat