Politikerit aalajangertussanngorpaat kommuni aggulunneqassanersoq
- Uanga ataatsimiinnermik aqutsisutut apeqqutigisussaassavara, Kommunip aaqqissuuteqqinneqarnera massakkut killiffik eqqarsaatigalugu inuillu aamma oqariartuuteqarnerat aallaavigalugu agguluisoqassanersoq? Imaluunniit suliaq naammassineqassanersoq? Borgmester Jess Svane Uummannami kommunalbestyrelsep ataatsimiinneranni unillatsiarnermi taama oqarpoq.
Kommunep aaqqissuuteqqinneqarnera pillugu suleqatigiissitaq illoqarfinni tamani kommuni pillugu innuttaasunut tusarniaareerluni inerniliussaminik naliliinerminillu ataatsimiinnermi saqqummiussisussaagaluarpoq, tamannali pinnani kommunip avinneqarnissaa oqallisigineqarluni isummerfigineqartussanngorpoq.
Oqallinnissarlu taasinertalik oqaluuserisassat kingullersaattut inissinneqarpoq, tassa kommunip ingerlanneqarnerannut tunngasut oqaluuserineqareerpata.
Taasinissap inernissaa massakkumuugallartoq eqqoriaruminaappoq, Siumut sinnerlugu kommunalbestyrelsemut ilaasortat gruppetut taasinatik, inuttut ataasiakkaatut taasissussaapput.
Siumut sinnerlugu kommunalbestyrelsemut ilaasortaq Kristian Jeremiassen aamma Atassut sinnerlugu kommunalbestyrelsemut ilaasortaq Knud Kristiansen kommunip avinneqarnissaanut apeqqutinik saqqummiussisuupput.