Uumassussilerisut Ittoqqortoormiuni qilalukkanik qernertanik 2008-mi kisitsigamik qilalukkat 2000-it takuaat. 2017-mi kisitsinermi 300-it takugaat, Fernando Ugardep nassuiaatigaa.Assi: Carsten Egevang

Politikerip uumassusilerisut qilalukkanik qernertanik kisitsineq kamaatigigaa

Piniaqqussaajunaartariaqarput, uumassusilerisut oqarput. Kisitsisoqaqqinniarli pisassallu qaffallugit. Politikereq Siumumeersoq Tunumi qilalukkat qernertat Inatsisartuni oqallisigineqarnissaat sioqqullugu taama piumasaqarpoq.

Nunatta kangiani qilalukkat qernertat kiseqqinneqartariaqarput. Inatsisartunut ilaasortaq Lars Poulsen taama isumaqarpoq.

Taamaattumik qilalukkat qernertat kiseqqissaaqqinneqarnissaaat, Inatsisartut ukiukkut ataatsimiinnissaannut siunnersuutigaa, Kisitseqqissaarneq siunissami nunatta kangianut pisassiisarnermut tunngaviliissaaq, Lars Poulsen siunnersuummini oqarpoq.

- Amerlanerusariaqarput. Inuttussutsimut peqassutsimullu naleqqusarneqartariaqarput.

- Tassani eqarsaatigaara, Tasiilami nunaqarfittanilu 3.000-it pallillugit innuttaqarpoq. Piniartut inuussutissarsiutigalugu akissarsiutigisinnaalissappassuk isumaqarpunga pisassat amerlineqartariaqartut.

Pinngortitaleriffik kisimi kisitsissanngitsoq, tunumili piniartut, qilalukkanik ulluinnarni najugaqartut, peqataassasut, siunnersuuteqartoq isumaqarpoq.

Naalakkersuisut Tunumut qilalukkanik qernertalinik pisassiissutaat

 

Ingerlatsiveqarfik Tasiilaq

2020: 10 

2021: 5

2022: 0                   

2023: 0

 

Ingerlatsiveqarfik Kangerlussuaq

2020: 0

2021: 10

2022: 15

2023: 10

 

Ingerlatsiveqarfik Ittoqqortoormiit

2020: 40

2021: 25

2022: 15

2023: 10
 

Uumassussilerisut Tunumi qilalukkanik qernertanik kisitsinerat maanna pitsutsinut naapertuutinngitsut, taanna isumaqarpoq.

- Nammineq isinnik takusakkat aallaavigalugit hundrelikkaarpassuit Aqutsiveqarfik Kangerlussuami kiisalu Tasiilap eqqaani aasaanerani takkuttarput.

Taamaattumik qilalukkanik qernertanik kisitseqqitttoqartariaqartoq, Lars Poulsen isumaqarpoq.

Pinngortitaleriffik: Piniarneq attanneqarsinnaanngilaq

Kisitseqqissaaqqikkaluaraannili aqutsiveqarfinni pingasuni, tassalu Ittoqqortoormiini, Kangerlussuarmi Tasiilamilu qilaluakilliartuinnarnera allanngornavianngilaq

Pinngortitaleriffimmi miluumasut pillugit immikkoortortaqarfimmi pisortaq Fernando Ugarte taama oqarpoq.

Tunumi qilalukkat qernertat ikingaarmata, nungutaanissaminnut ulorianartorsiortut uumassussilerisut oqarput.

- Qilalukkat qernertat siunissami qulakkeerneqassappata, maannakkoqqissaaq eqqissisimatinneqartariaqarput, Fernado Ugarte oqarpoq.

Uumassussilerisut Ittoqqortoormiuni qilalukkanik qernertanik 2008-mi kisitsigamik qilalukkat 2000-it takuaat. 2017-imi kisitsinermi 300-it takuaat.

Aamma Kangerlussuarmi qilalukkat qernertat ikileriarput.

2008-mi 600-ooriarlutik 2016-imi 300-it missaannaannik amerlassuseqalerput.

Tasiilami qilalukkat suli ikinnerusut, Fernando Ugarte nassuiaavoq.

- Kisitseqqittoqarnissaq pisariaqanngilaq. Ilisimasavut naammapput. 2016-mi 2017-imilu kisitsinermi paasisat ersareqaat. Maannakkutut piniarneqartaannassappata, qilalukkat naammanngillat, aasakkut kisitseqqikkaluaraanni, qilalukkat naammanngitsut uppernasinneqaannassaaq, Ugarte oarpoq.

Naalakkersuisut inassutit malissimanngikkaat

Ugarte Pinngortitaleriffimmi timmissat miluumasullu pillugit immikkortortaqarfimmi pisortaanermi saniatigut nunani avannarlerni imaani miluumasut pillugit ataatsimiititaliami NAMMCO-mi ilaasortaavoq, tassanilu  ilisimatuut aamma biologit ilaasortaapput. Kalaallit Nunaata, Savalimmiut, Norgep Islandillu ataatsimiititaliaq suleqatigiiffigaat.

Fernando Ugarte ataatsimiititaliarlu uumasunut miluumasunut aqutsinermut tunngatillugu piujuartitsinissamik qulakkeerinissamik siunnersuuteqartarput. Assersuutigalugu qilalukkat qernertat pineqartillugit.

Tunumi qilalukkat qernertat tunumi piniagaannginnissaat ataatsimiititaliap 2019-imi novembarimili innersuussutigisarpaa.

AAMMA ATUARUK Naalakkersuisut tunumi qilalugartassat amerlinianngikkaat

Innersuussinerli taanna Naalakkersuisunit malinneqanngilaq. Naalakkersuisut Tunumi qilalukkanik qernertanik 2020-mi januaarimi pisassiissuteqarput. Pisassiissutit siorna 2020-mi 50-iupput. 2021-mi 40-t. 2022-mi 30-t 2023-milu 20-nik pisassiissuteqarlutik.

- Ilungersunartorujussuuvoq, qilalukkammi qernertat tunumi nunap eqqississimatitap kujataanniittut maannakkutut piniarneqaannarunik nungutaanissaat aarlerinarpoq, Ugarte oqarpoq.

Qilalukkanik qernertanik 2023-p tungaanut pisassiissutit allanngortinneqarnissaannut Naalakkersuisut pilersaaruteqanngitsut, Aalisarnermut Piniarnermullu Naalakkersuisup Aqqaluaq B. Egedep juunimi oqaatigaa.

Tamanna paragraf 37 naapertorlugu Lars Poulsenip Siumumeersup apeqquteqaataanut akissuteqarluni paasissutissiissutigaa,

Lars Poul qilalukkanik qernertanik nutaamik kisitsisoqarnissaanik kissaateqartutuaanngilaq. Inuit Ataqatigiinnit Harald Bianco aamma Knud Mathiassen inatsisartut ukiakkut ataatsimiinnissaannut assingusumik aamma siunnersuuteqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat