Politikerinut piumasaqarfiungaatsiartussaavoq
Nunatsinni aluminiumik aatsitsiviliornissamik pilersaarutit suliffissanik nutaanik aningaasarsiorluarnissamillu isumalluartitsipput. Politikkerinullu tamanna piumasaqarfiungaatsiartussaavoq. Pilersaarusiaq iluatsissappat politikkerit inuiaqatigiinni iluarineqarpallaanngitsunik aalajangiisariaqassapput. siunnersuisoqarfik Niras Greenland-ip nalunaarusiamini oqariartuutigaa.
Politikkikkut aalajangiisarnermi ataasiinnarmik amerlanerussuteqarluni aalajangiisarneq Inatsisartuni takornartaanngilaq. Nunatsinni aluminiumik aatsitsiviliortoqassanersoq ukioq manna aappaagulu aalajangiisoqarnialerpat toqqissisimanarpallaarnavianngitsoq, aningaasatigut kingunerisinnaasai pillugit misissuereerlutik siunnersuisoqarfiup allaaseraa.
Misissueqqissaarneq Greenland Development-imit suliakkiissutaasoq, naalakkersuisut sinnerlugit Amerikamiut aluminiliorfissuannut Alcoa-mut isumaqatiginniutigineqassaaq.
Nalunaarusiaq aallaavigalugu nunatsinni sulisussaqarniarneq eqqarsaatigalugu inuiaqatigiinnit iluarineqarpallaanngitsunik aalajangiisoqartariaqassaaq. Soorlu aalisarnermut tunngasut aaqqissuuteqqittariaqassapput, taamaasilluni kilisaatit tunisassiorsinnaasut annerusut pilersinneqarnerisigut sulisut ikinnerusut pisariaqartinneqassammata.
Nunaateqarnermut tunisassiornermullu tapiissutit iluarsartuunneqassapput, taamatuttaaq piniartut piniartuunertik qimallugu aluminiumik aatsitsivimmi sulilernissaminnut kajumissuseqalersinniarneqassapput.
Pisortat suliffeqarfiutaat pitsanngorsaavigineqassapput avinngarusimasuniittullu kiffartuussinermut isumaqatigiissutinut tunngassuteqartut immikkut aaqqissuunneqartarnerat unitsinneqassalluni.
Siusinaartumik sulisinnaajunnaarnersiutisisarneq sukanganerulissaaq, immaqalu utoqqalinersiuteqalertarnermut ukiut killigitinneqartut qaffanneqassallutik.
Kalaallit naammattut aluminiumik aatsitsivimmi sulilernissaat anguniagaavoq.
Niras isumaqarpoq siunnersuutigisartik naapertorlugu nunatsinniit inuit 1000-it tungaanoortut sulisorilerneqarsinnaassasut.
Aluminiumik aatsitsiviliornissamut tunngatillugu siunnersuisoqarfiup siunnersuutigaa, politikerit aalajangigassanik iluarineqartunik iluarineqanngitsunillu aalajangiisariaqassasut. Taamaaliornikkut siunissaq ungasinnerusoq eqqarsaatigalugu inuit pilersaarusiamut tatiginninnerulissammata. Taamalu allamik suliffeqalernerup, ilinniagaqarnerup allamullu nuussinnaanerup pitsaaqutai takusinnaaniassammatigik.
Upernaamut Inatsisartut ataatsimiilerunik Alcoap pilersaarutaa isummerfigissavaat. Taamatuttaaq aatsitsiviup sumiinnissaa aalajangiiffigineqassaaq.
