Politikeri: Tamat oqartussaaqataanerat nukillaarsarneqarpoq

Politikerit inuusuttut pissangartunik anguniagallit ilaquttatik pingaarnerutillugit Inatsisartunut qinigassanngortinngitsoortarput. Inatsisartuni sulinermi atugassarititaasut tamatumani ajornartorsiutaapput. Politikerit malunnaatillit pingasut taama oqarput. Malik Berthelsenip Siumumeersup Juliane Henningsenillu Inuit Ataqatigiinneersup akunnakusoortoqartippaat. Qaasuitsup Kommuniani Siumut sinnerlugu kommunalbestyrelsimut ilaasortap Palle Jeremiassenip isumaqatigai.

- Pissanganarpoq soqutiginarlunilu. Ilaqutariinnulli sunik kinguneqartarnersoq eqqarsaatigiaanni tunuarsimaartoqalersarpoq, Palle Jeremiassen, kaammattorneqaraluarluni qinigassanngortinnianngitsoq oqarpoq.

Marlunnik qitornaqarpoq, eqqarsaatigilluareerlugulu qineqqussaarani ilaquttani aallunniarlugit toqqarsimavaa.

- Suleriaaseq maanna atorneqartoq ilaqutariinnut meerartalinnut naleqqutinngilaq. Aamma inuussutissarsiuutinut allanut sanilliukkaanni, piffissamut naleqqutinngilaq, Palle Jeremiassen oqarpoq.

- Ataatsimiinnerit ukioq tamaat eqqarsaatigalugu simammarneqarnissaat siunnersuutigerusuppara. Taamaalilluta aamma suliat pingaarutillit tuavisaarunneqannginnissaat qulakkeersinnassavarput. Aamma inuit piukkunnartut amerlanerusut Inatsisartunut qinigassanngortissinnaanissaat taamaaliornikkut angusinnaavarput. Tamannalu tamat oqartussaaqataanerannut iluaqutaassaaq, Palle Jeremiassen oqarpoq.

Malik Berthelsen Siumumeersoq piffissaq ilaquttaminut atorusunnerullugu Inatsisartut qinigassanngorteqqinniarani aalajangersimavoq.