Politikeri Siumumeersoq kommunalbestyrelsimut ilaasortaajunnaalersoq

Johan Barlaj Kommuneqarfik Sermersuumi kommunalbestyrelsimut ilaasortaajunnaartussanngorpasippoq. Politiiusimasup Siumullu sinnerlugu Paamiuni qinigaasup aasaq eqqartuunneqarnera Nunatta Eqqartuussivianit atuutiinnartussanngortinneqarpoq.

Taanna pinerluttulerinermi inatsimmi paragraf 98-imik unioqqutitsisimasutut, tassalu sioorasaarisimasutut, Paamiut Eqqartuussiviani ukiormanna juunip 24-iani eqqartuunneqarpoq. Ulluin 30-ni pinerluuteqarsimasunik inissiisarfimmiittussanngorlugu pinerloqqissagaluaruni aatsaat naammassisassamik ukiumilu ataatsimi nakkutigisassatut eqqartuunneqarpoq, Johan Barlajillu illersuisuiata pineqaatissinneqarnera suliassanngorteqqippaa iperagaanissaanik piumasaqaateqarluni.

Johan Barlaj aggustimi 2008-mi angut tigusarisani toqunniarlugu sioorasaarsimagaa nittartakkami Sermitsiaq.AG-mi atuarneqarsinnaavoq.

Angutip taamatut sioorasaarneqarnini assut annilaangassutigisimavaa, kamattumit taamatut oqarfigineqarnini ilumoortuunasoralugu inuuninilu ulorianartorsiorsorisimallugu. Tigusarineqartup oqaluttuaraa sooq sioorasaarneqarsimanerluni nalullugu, Johan Barlajilli angummi angallataanik pisiniarnerannut attuumassuteqarsimasimasinnaasoq eqqoriarpaa. Johan Barlaj eqqartuussivimmi tamanna ilumuunnginnerarpaa, nammineq angallateqareerami, Sermitsiaq.AG  taama allappoq.

Johan Barlaj Siumut sinnerlugu kommunalbestyrelsimut aasaq qinigaavoq, qaammatillu arlaqanngitsut qaangiummata eqqartuunneqarluni, illersuisuatali pineqaatissinneqarnera suliassanngorteqqimmagu kommunalbestyrelsimut ilaasortaanini pigiinnarsinnaasimavaa.

Qinigaanerup misilinneqarnissaanut ataatsimiititaliap siulittaasua Søren Søndergård Hansen oqaluttuarpoq suliaa aallartinneqareersimasoq, ukiumilu nutaami januaarip aallartinnerani ataatsimiittoqarnissaa aalajangiisoqarnissaalu naatsorsuutigalugu.

Johan Barlaj kommunalbestyrelsimit ilaasortaajunnaarsinneqassappat, sinniisussamit siullermit Tim Serritzlev, Siumut, taarserneqassaaq.

Johan Barlaj pissarsiariniaraluaratsigu iluatsissinnaasimanngilarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat