Kangaatsiami atuarfik: Politikeri oqartussaasunik isorinnittoq: - Meeqqat sumiginnarneqarput

Meeqqat angajoqqaallu Kangaatsiap Atuarfiani Iparartarfimmi killissamik qaangiisoqarneratigut oqartussaasunit sumiginnarneqarput. Politikeri Aqqa Samuelsen (S), suliamut nammineerluni akuliuttoq, taama isumaqarpoq.

Allattoq Markus Valentin

maajip 14-at 2026 09:18

Nutserisoq Medea Olsen

Angajoqqaat sisamat qitornaminnut Kangaatsiap Atuarfiani Iparartarfimmi nakuusertoqarnera kannguttaatsuliortoqartarneralu pillugit misigisaminnik tamanut ammasumik allagaqarput.

Kommune Qeqertalimmi kommunalpolitikeri Aqqa Samuelsen (S) ukiakkut 2025-mi attaveqarfigaat.

Taassumap kommuni, politiit Namminersorlutillu Oqartussat iliuuseqannginnerat pillugu sakkortuumik maanna isornartorsiuivoq.

- Meeqqat angajoqqaallu ikiorneqanngillat. Oqartussaasut sumiginnaarujussuarput, Aqqa Samuelsen oqarpoq.

Aqqa Samuelsenip oqarnera naapertorlugu, angajoqqaat ikiorneqarumallutik oqartussaasunut arlalinnut saaffiginnittaraluarput, iluatsinngitsumilli.

KNR ukkatarinnittoq: Kangaatsiap Atuarfia Iparartarfik

KNR-ip meeqqanut killissamik qaangiisumik pissusilersuutit, kinguaassiuutitigut naapertuilluannginnerit nakuusernerillu pillugit oqaluttuat arlallit piffissami tulliuttumi saqqummiutissavai.

Oqaluttuat tamarmik Kangaatsiap Atuarfiani Iparartarfimmi angajoqqaanit meeqqaniillu oqaluttuarineqarput.

Illit imaluunniit nalunngisavit arlaat meeqqat atuarfianni assingusumik nalaataqarsimaguit redaktion@knr.gl-imut attaveqarnissannut tikilluaqqusaavutit.

Kisimiittutut misigisimaguit oqaloqateqarnissannillu pisariaqartitsiguit Tusaanngamut attaveqarsinnaajuaannarputit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit.

Oqarasuaat: 80 11 80

SMS: 1899

Takussaasumik iliuuseqartoqanngitsoq

Taamaattumik angajoqqaat allagaat tunngavigalugit Kommune Qeqertalimmut novembarip 12-ianni 2025-mi pisortatigoortumik saaffiginnippoq.

Ernumassutini nalunaarutiginninnissamullu pisussaaffik sukatigaq saaffiginninnermini innersuussutigaa.

Aqqa Samuelsenilli oqarnera naapertorlugu suli pisoqanngilaq.

- Maanna apriiliuvoq, suliamilu suli pisoqaqqinngilaq. Atuartut suli ikiorserneqanngillat, taanna oqarpoq.

Taassumap Meeqqanut, Inuusuttunut Inatsisinut Atuutsinneqarnerannut Naligiissitaanermullu Naalakkersuisoqarfik Ilinniartitaanermullu Aqutsisoqarfik aamma attaveqarfigai.

Taassumap paasissutissiinera naapertorlugu, ilinniartitsisoq kinguaassiuutitigut kannguttaatsuliorsimasorineqartut aappaa Kangaatsiamit nuunnikuuvoq.

- Meeqqalli suli ikiorneqarnissartik pisariaqartippaat. Suliaq atuarfiup pisortaanut illoqarfiullu pisortaanut aamma nalunaarutigineqarpoq, iliuuseqarfigineqanngilarli, taanna oqarpoq.

Politikerip oqarnera naapertorlugu ilinniartitsisup aappaa atuarfimmi tassani suli sulivoq.

Misissuisoqaqqugaa

Aqqa Samuelsenip suliap misissorneqarnissaanik kommuni kaammattorpaa.

- Meeqqat atuarfimmi kinguaassiuutitigut kannguttaatsuliornernik aamma timikkut tarnikkullu persuttagaanermik misigisaqarsimanerat saaffiginninninni allaaseraara. Tamanna sukumiisumik misissuiffigineqassasoq kommuni kajumissaarpara, taanna oqarpoq.

Taassumap aamma ilinniartitsisut pineqartullu atuarfimmilu aqutsisut suliap misissorneqarnerata nalaani atorfimminnit suliunnaarsitaagallarnissaat siunnersuutigaa.

Kommunip saaffiginnissummik tigusaqarnini ulloq taanna nalunaarutigaa, suliarlu suliarineqartoq nalunaarutigalugu.

- Isumaqarpunga arlaannaannulluunniit attuumassuteqanngitsumik misissuisoqarnissaa isumatusaarnerussasoq. Meeqqanut kinguaassiuutitigut killissamik qaangiinerit kommunitsinnit iliuuseqarfigineqartarnerat pitsaanerulersinneqarnissaa sulissutigiuarpara, pingaartumik atuarfeqarnerup iluani.

Politiit Aasianni immikkoortortaqarfiata politikeri decembarimi misissuiniarlutik ilisimatippaat.

Politikeri politiinut nalunaarutiginnimmat tamanna pivoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.