Rusland: Politikeri illua’tungiliuttoq parnaarussaanerminit iperagaasoq

Ruslandimi politikeri illua’tungiliuttunut ilaasoq Aleksej Navalnyj ulluni 30-ni paarnaarussaaqqareerluni iperagaavoq.

Taassuma oqaaseqartartua Twitterikkut taama paasissutissiivoq.

Navalnyj qungujulalluni paarnaarussivimmit anisoq assimi Twitterikkut saqqummersinneqartumi takuneqarsinnaavoq.

Navalnyj Ruslandimi illua’tungiliuttuni tusaamasaanerpaagunarpoq, arlaleriarlunilu paarnaarussaasareerluni.

Illua’tungilittut arlarlit illoqarfinni qaammatip tulliani qineqqusaarsinnaannginnerannut Moskvap qiterpasissuani akerliussutsimik takutitsinissamik kaammattuuteqarami akerliussutsimik takutitsinermut Ruslandimi inatsisinik unioqqutitsisutut kingullermik eqqartuussaavoq.

Navalnyj Vladimir Putinimut isornartorsiuisarpoq, ilaatigut præsidenti pissaanermik atornerluisuunerarlugu.

Illua’tungiliuttuni politikerit nuimasut allat inuillu untritillit arlarllit akerliussutsimik aasaq manna takutitsinermut peqataasut tigusaapput.

Putinip nuannarineqarnera qaammatini kingullerni milliartupiloorpoq. Allannguisoqarnissaanik piumasaqartut akornanni ernumasoqartoq Kremlimut isornartorsiuisut oqarput.

Russerpassuit ilaatigut soraarnerussutisiat pillugit aaqqissuusseqqinneq pissutigalugu naalakkersuisunut Putinimullu kamallutik qisuariarput.