Politikeri IA-meersoq: Inuit Naalakkersuisunut tatiginninnertik annaalerpaat

Inuit isumaannik misissuinerup kingulliup takutippaa IA-p qinersinermi annaasami annersaa pissarsiareqqikkaa siuariarlunilu, Aqqaluaq B. Egedellu taamaattoqarneranut suna pissutaanersoq nassuiaatissaqarnerarpaa. Innuttaasut nunap siuttui tatigiunnaarsimavaat, toqqissisimanartumillu aqutsisoqarnissaanik maqaasisaqarlutik.
decembarip 04-at 2013 12:11

Egedep IA-p siuariarneranut qinersiviup matuma aallartinneraniit Inuit Ataqatigiit siunnerfigisaminnik attassisimanerannik neriorsuutinillu timitalersuinerannmik, pissutsillu ilungersunarsiartorneranni inuiaat ataatsimoornissaannik ataqatigiinnerunissaannillu timitalersuerusunnerannik pissuteqarnerarpaa.

Tatiginninneq innuttaasut ullormi qinersivimmi Siumumut takutitaat partiip tungaanut saatinneqarsimavoq, Naalakkersuisut upernaaq ivertinneqarnemik kingorna politikkikkut anguniagarisimasaasa innuttaasunik avissaartuutsitsisimanera pissutigalugu.

- Aatsitassat pillugit, oqaatsit pillugit, minnerunngitsumillu qineqqusaarnermi inuiannut ne-riorsuutitik qimallugit aalajangersaanermikkut tatiginassusertik annaalerpaat. Pissaanerup tiguneqarnissaa qineqqusaarutit piviusunngortinnissaanniit pingaarnerutinneqarsimagunarput, Aqqaluaq B. Egede nassuiaavoq.

Politikeri IA-meersup oqaatigaa  Naalakkersuisut maanna atuuttut nalaanni Nunatsinni aalisartut aatsaat taama sakkortutigisumik akitsuusersorneqartigisut, tusarniaanerillu Aleqa Hammondip naalakkersuisunut siulittaasuunerata nalaani ingerlanneqartut sivikippaallaarujussuarsimasut.

-Naak Siumut Atassut qineqqusaarnerminni taamak qineqqusaaruteqanngikkaluartut. Inatsisartut Aningaasanut inatsisissaat suliarineqarmat aningaasanik aallerfiusut annaasaqartullu tamarmik tusarniaaffigineqanngillat. Naak naalakkersuisooqatigiit qineqqusaarnermi taamak siunnerfeqanngikkaluartut, Aqqaluaq B. Egede isumaqarpoq, aammalu Siumup Inatsisartunut ilaasortaatitai akuersaaginnartartussatut sulitinneqartutut taallugit.