Politikeri: GME DVD-mik paasisitsiniaanera uukapaatitsineruvoq

Uranitalinnik piiaanerup ulorianassusia paasisitsiniaanermi ilanngunneqanngilaq tamannalu ulorianarpoq, Kommune Kujallermi kommunalbestyrelsemi ilaasortaq Lisbeth Søvndahl Pedersen oqarpoq.

Greenland Minerals Energy uukapaatitsiniartutut pissuseqarput, imerniartarfinni imertitsisarlutik, meeqqat balloninik tuniorarlugit savanik nerisitsillutik taamaaliornermikkut imatut oqariartuuteqarput, "Narsarmiut, kalaallit inuiaat illersortigut suliffissat aamakkua milliardit koruunit aamakkua pissasi ! " Lisbeth Søvndahl Pedersen oqarpoq.

-Tamanna paatsoornerujussuuvoq, Kuannnersuarni suliatsinnut akerliusut kamannerat paasisinaavara, taamaakkaluartoq Lisbeth Søvndahl Pedersenip isornartorsiunera paasisinnaanngilara, Erik Holmsgaard Greenland Minerals & Energymi paasissutissiisartoq oqarpoq.

- Siullermik pissutsinut pivisut pinngilai. Kuannersuarni aatsitassarsiorniarnermut akerliusoqarnera ajunngilaq, taamaattorli takornartanik akerliorpalaartumik nipaqarnera iluaqutaasinnaanngilaq, Erik Holmsgaard oqarpoq.

- Narsami imerniartarfinni imigasssanik tunioraasimanitsinnik oqarnera suminngaanit pisimaneraa ilisimanngilara, aamma oqarpoq.

- Suliffeqarfissuaq Royal Greenland imaluunniit Air Greenland suliffeqarfilluunniit alla timersornermik aaqqissuussinernut timersortartunilluunniit aningaasaliippat uagut taamaaliornerput taakkunaannga sutigut allaanerunersoq takusinnaanngilara, Erik Holmsgaard oqarpoq.

-Narsami innutaasut inuusuttullu soqutigisaannik tapersersorniarutsigit timersortartut tapersersorsinnaavagut Erik Holmsgaard oqarpoq.

Lisbeth Søvndahl Pedersen isumaqataanngilaq

Lisbeth Søvndahl Pedersenip erseqqissarpaa, uranitalinnik piaasinnaanissamut inatsit suli naammassinngitsoq suli oqallisigineqarmat. Naalakkersuisut uranitalinnik piianngilluinnarnissamik politikkeqartut aamma erseqqissaatigaa.

- Naalakkersuisut paasissutissiinerminni uran kisiat pillugu paasissutissiisut taamaliornerallu illuinnaasiorneruvoq uagulli uran kisiat soqutigisaringilarput Greenland Minerals Energyp paasissutissiisartua oqarpoq.

Naalakkersuisut pinngortitamut innutaasunullu inatsisilerituujummata suliaq taakkununnga ingerlateqqinneqartariaqartoq Lisbeth Søvndahl Pedersen isumaqarpoq.

Uranitalinnik piiaanngilluinnartoqarnissap atuunnera Aatsitassanut naalakkersersuisup Ove Karl Berthelsenip ullo'qeqqaanerani radioaviiseqarnitsinni oqaatigaa.