Nuummi Timersortarfik Folketingimut 2019-imi juunip tallimaani qinersiviuvoq. Qinersivissanik piareersaanissaq piffissanngulerunarpoq.

Politikerertavut Folketingimut qinersinermi aalajangiisuusinnaasut

Folketingimut qinigassanngortittut nunatsinneersut suli pingasuinnaagallarput. Qinigassanngortittulli akornanni Atlantikup avannarpasissuaneersut qinersinermi aalajangiisuulluinnarsinnaasut, inunnik isumasiuinerit takutippaat.

Danmarkimi politikerit nutaarsiassaqartitsiviillu siulittuutigisaat piviusunngussappat, Mette Frederiksen (S) qinersisitsinissamik ullumi marlunngornermi nalunaaruteqartussaassaaq.

Qinigassanngortittulli akornanni sisamat Atlantikup avannarpasissuaneersut ministeriuninngortussap kiunissaanut sunniuteqarluinnartumik qinersinermi aalajangiisuusinnaapput.

Inunnimmi isumasiuinerit tamanna takutippaat.

Folketingimi ilaasortat akornanni saamerlerneersut talerperlerneersullu naligiikanneqisut, Epinionip DR-imit nittartakkakkullu nutaarsiassaqartitsivimmit Altingetimit iminneqarluni inunnik ippassaq ataasinngornermi isumasiuinerani erserpoq.

Taakkuli akornanni arlaannaalluunniit naalakkersisunngortitsiniarnissami amerlanerussuteqarnavianngitsut erserpoq. Taamaammat Lars Løkke Rasmussenip partii siulittaasuuffigisaa, tassa Moderaterne aalajangiisoorataannaapput. Allalli, tassa Folketingimut qinigassanngortittut akornanni sisamat Atlantikup avannarpasissuaneersut tamarmik ministeriuninngorniuttuni ajugaasoq tapersersorunikku, aamma aalajangiisuusinnaappput.

Inunnilli ippassaq ataasinngornermi isumasiuinerit naapertorlugit De Konservativekkunneersoq Søren Pape Poulsen Venstrekkunneersorluunniit Jakob Ellemann Jensen ministeriuninngortussatut qinigassanngortittut akornanni sisamasaasunit tamanit Atlantikup avannarpasissuaneersunit aatsaat toqqarneqarpata talerperlerneersut aatsaat taaguunneqarluarnikkut amerlanerussuteqalersinnaapput. 

Naleraq IA-lu kisimik Folketingimut qinigassanngortitaqartut

Inunnik 2022-mi oktobarip aappaani isumasiuineq

Epinion DR-imit nittartakkakkullu nutaarsiassaqartitsivimmit Altingetimit iminneqarluni inunnik isumasiuinerani erserpoq:

Saamerlerneersuni 84-it qinigassanngortittut (ukunaneerlutik: Enhedslisten, SF, Socialdemokratiet taavalu Radikale Venstre)

Talerperlerneersuni 86-it qinigassanngortittut (ukunaneerlutik: Venstre, Konservative Folkeparti, Liberal Alliance, Dansk Folkeparti, Nye Borgerlige taavalu Danmarksdemorakterne)

Moderaterneersuni tallimat qinigassanngortittut

Folketingimi ilaasortat 179-iupput. Taamaammat amerlanerussuteqarniaraanni 90-inik qinigaatitaqarnissaq pisariaqarpoq.

Nunarput Savalimmiullu tamarmik immikkut marlunnik Folketingimi qinigaatitaqarput.

Tusarfik: Altinget.dk

Danskit partiivi Folketingimut aasarli qinigassanngortitsipput. Nunatsinneersulli Folketingimut qineqqusaartut pingasuinnaapput, taakkunanngalu marluk kisimik Folketingimi ilaasortanngussapput.

Kiista Fencker qinigassanngortittunut ilaavoq. Taanna peqqissutsimut siornatigut naalakkersuisuuvoq Naleqqamilu maanna aningaaserisuulluni. Juno Berthelsen qinigassanngortittunut aamma ilaavoq. Taanna Namminersorlutik Oqartussani atorfeqarpoq Naleqqallu ulluinnarni aqutsisuini qinikkatut sulilluni.  

Nunatta naalagaaffinngornissaa sulissutiginiarlugu Folketingimut qinigassanngortissimallutik, taakku ilisimatitsipput.

AAMMA ATUARUK Naleraq folketingimut marlunnik qinigassanngortitsisoq

Inuit Ataqatigiit ataatsimik aamma qinigassanngortitaqarput, tassaasoq: Aaja Chemnitz. Taanna Folketingimi 2015-imili ilaasortaasoq Folketingimut pingajussaanik qinigassanngortippoq.

Sulili qinigassanngortinniartoqarsinnaavoq.

Qinigassanngortinnissamummi malittarisassat naapertorlugit qinersinissamut ullut aqqaniliinnanngortinnagit qinigassanngortittoqarsinnaavoq.

Qinigassanngortinnissamut piffissarititaq qaangiuppat qinigassanngortinniartut qinigassanngortinnissamut piumasaqaatinik naammassinnissimanissaat Naalagaaffiup Sinniisoqarfianit qulakkeerneqassaaq.

Paartiimi ilaasortatut attaviitsutulluunniit qinigassanngortittoqarsinnaavoq, partiimilu ilaasortatut qinigassanngortittut partiimit ilaasortaaffigisimannit akuerisaasimanissaat piumasaqaataavoq. Attaviitsutulli qinigassanngortinniaraanni inunnit 100-nit ikinnerunngitsunit qinigassanngortitsisoqarnissaq taakkulu kiunermik, nunatsinni najugaqarnermik cpr-normumillu uppernarsaateqarnissaat piumasaqaataavoq.

Danskit naalakkersuisui ikorfartortiminnit kimigiiserfigineqartut

Mette Frederiksen Folketingi oktobarip sisamaani ammaanersiortinnagu qinersisitsinissamik nalunaaruteqanngippat, Radikale Venstrekkut naalakkersuisut ikorfartukkatik uppisinniarpaat.

Danskit naalakkersuisui minkit tamarmik coronavirusip tuniluutileruttornerani toqorarneqarnissaannik naalakkiinertik pillugu minkit pillugit ataatsimiititaliarsuarmit isornartorsiorneqangaatsiareersullu, Radikale Venstrekkut taamaaliorput.

AAMMA ATUARUK Folketingimut qinigassanngortittut kikkuuneri partiit isertuuppaat

- Taamaammat Mette Frederiksen Folketingi oktobarimi aammaanersiortinnagu qinersisitsinissamik aasaq manna feeriarfiup kingorna nalunaaruteqassasoq ullumi kajumissaarparput. Nutaamimmi aallartitsisoqartariaqarpoq, Radikale Venstrekkut siulittaasuat Sofie Carsten Nielsen Facebookimi juulimi allappoq.

Folketingimi ataatsimiinneq ullumi oktobarimi marlunngornermi siullermi ammarneqassaaq. Qinersisitsisoqassappalli Folketingimi ataatsimiinnissaraluit, inatsissatullu siunnersuutinik saqqummiinissaraluit aalajangiinissaraluillu tamarmik taamaatitinneqassapput. Ataatsimiititalianili ataasiakkaani suliinnartoqassaaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl