- Nive Nielsen-ili kalaallini kisiartaanngilaq nipilersoriaatsimi indiemusik-imik taaneqartartumik angusaqarluarsimasoq. Kalaallimmi inuusuttut nunarsuarmioqataanertik Danmarkimuinnarlu atannginnertik paasisimavaat, Politiken taama allappoq.
Nive Nielsen aamma The Deer Children erinarsuusiaat "Pirate Song" USA-mi Independent Music Awardsimi juulimi erinarsuusiallammattut nersornaaserneqarpoq. Aamma tuluit nipilersornermi festivaliannut Glastonbury-mik taasamut qaaqqusaasimavoq naaggartariaqarlunili nipilersoqatigiit angallannissaannut akissaarunneq peqqutigalugu.
Nivi Nielsen-ip tupigusuutigaa danskit festivaaliisa soqutiginninnginnerat:
- Europami festivaalini assigiinngitsuni tusarnaartitsisinnaavugut. Glastonbury-imut qaaqqusaavugut - kisianni Spot aamma Roskilde sianinngillat. Tamanna eqqumiigaara, Nive Nielsen Politiken-imut taama oqarpoq.
Simon aamma IMA-mut
Kalaaleq Simon Lynge IMA-mi aamma nersornaasigassatut inassutigineqaraluarpoq nersornaaserneqaranili. Saqqummersitaali kingulleq ’A Beautiful Way to Drown’ nunani assigiinngitsuni nersualaarneqaqaaq.
- Danmark assersuutigissagaanni – qallunaat nipilersortartui nersornaasigassatut nersornaasiinermi tassani inassutigineqanngillat, Politiken taama allappoq.