Politik pillugu oqaaseqartartoq: Politikki aqqutigalugu tatisimaniarneq atorsinnaanngilaq

- Piffissap kingulliup ingerlanerani pisut isigissagaanni, aalisarnermut politikkimut tunngasunik tusaaniarneqanngiinnassagunik siumumit tunuarniarlutik inatsisartuni gruppemi ilaasortat pingasut siorasaarutigaat. Taamaammat akunnerminni eqqissiallattoqarsimaneranik tamanna takussutissaanngilaq, Sten Lund Qanoruumut oqarpoq.

Sten Lundillu isumaa malillugu taamatut potikki aqqutigalugu tatisimanninniartarneq Naalakkersuisut atorsinnaanngilaat.

- Taamatut siorasaarisoqartartillugu pissutsit najummassimanartarput. Naalakkersuisullu politikkikkut ersarissumik tunaartaliisinnaajunnaarsipajaartarlugit.

Aamma politikki pillugu malinnaasutoqanngortup isumaa malillugu qinersisartut naalakkersuisoqatigiinnut tatiginnikkunnaariaannaapput. Taamaattoqarneranilu massakkut Naalakkersuisut siulittaasuat nunamut allamut tikeraartup siuttuunini takutissinnaalertariaqarsoralugu.

- Aleqa Hammond imaannaanngitsunik unammilligassaqarpoq. Taassumami politikki kikkut tamarmik akuersaarsinnaasaat sassaalliussinnaasariaqarpaa, Sten Lund oqarpoq, Aleqa Hammondilu Siumut kisimi siuttuuffiginagu Naalakkersuisunut aamma siulittaasuunera eqqaamallaqqullugu.

Aleqa Hammondilli isumaa malillugu pisut qassiiliorfiusut kingulliit nukillaajatsissimanngilaat.

- Pisut kingulliit nukillaajallatsissimanngikkaanga erseqqissaatigissavara, isornartorsiunerimmi tamarmik tusaavakka. Inuppassuimmi tapersiinerarlutik uannut nalunaartareerput, uannullu nukittorsaataalluarsimalluni, taama Qanoruumut oqarpoq.

Aamma taassuma isumaa malillugu isornartorsiunissamut inissaqartitsisoqartariaqarpoq, maannalu Siumup gruppeani ataqatigiilluartoqarnerarpaa politikkillu ingerlanneqarnerani ataqatigiilluartoqarnerarlugu.

- Aaliangiisinnaassuseqartunik naalakkersuisoqarpugut, anguniagaqarumalluartunillu naalakkersuisoqarluta, Aleqa Hammond taama naqissusiivoq.