Politiiusimasut pineqaatissinneqartut inuttaaqataasuinnaapput

Ikiaroornartumik hashimik eqqussuisarnermut tuniniaaqqittarnermullu suliamut atatillugu, inuit marluk aamma tiguneqarput, maannalu inuit qulit tiguneqarsimasut ilaqqipput.

Nunatsinni Politimesterip Steen Thomsenip suliamut uunga atatillugu politiiusimasut pineqaatissinneqartut, inuttaasutut naliginnartut isigivai.

-Angutit marluk pineqaatissinneqartut inuttaasutut naliginnartut uanga isigaakka, tassami politiitut suliunnaareernermi kingorna pinerluuteqarsimagamik.

-Taamaattumik uanga tunginninngaanniit inuttaasuupput politiitut sulisimasut, aamma eqqarsarnartoqartippara uku angutit politiitut sulisuusimasut ikiaroornartumut tunngasumik pinerluuteqarsimammata, maluginiarparalu politiit akornanni ukua pinerluutaat akuersaarneqanngilluinnarmat.

Ikiaroornartumik hashimik eqqussuisarnermut tuniniaasarnermullu suliamut atatillugu inuit arfinillit pineqaatissinneqareerput, inuit pingasut akiligassinneqarlutik, ataaseq unnerluutigineqarluni, ataaseq pineqaatissinneqarnissaminik utaqqivoq, ataaserlu tigummigallagaavoq sapaatit akunneratalu ingerlanerani pineqaatissinneqarnissaa ilimagineqarpoq.