Politiit unioqqutitsisarnerannut suliniuteqartoqarpoq

Kalaallit Nunaanni politiit qulingiluat akornanni ataaseq 2006-imi inatsisinik unioqqutitsisimavoq. Naalagaaffeqatigiinneq eqqarsaatigalugu naalagaafeqatigiinnermi tassa amerlanersaapput, tamanna Naalagaaffiup politiivisa nalunaarusiaanni erserpoq. Aqqaluk Petersen, Kalaallit Nunaanni politiit Peqatigiiffianni siulittaasuusoq, isumaqarpoq, politiit suliassaqarnerujussuat tamatumunnga pissutaasoq:

- Politiit tikkuagaannut ilaavoq, inoqarfiit politeeqarfiillu assigiinngitsorujussuummata, politeeqarpugut piffinni mikisunnguani aamma politiit ikittunnguusarput, suliassallu imaannaanngitsut politiit suliarisarpaat. Taamaattumik qasunermik immaqa pissuteqartumik ilaatigut immaqa pissusissamisoorpallaanngitsumik pissusilersorsinnaasarput. Ulluinnarni ullaakkut immaqa nalunaaqutaq arfineq-pingasuniit ualikkut sisamat tungaanut nalinginnaasumík suligunik, oqarasuaatit angallattakkat angerlaattariaqartarpaat, piareersimajuaannartussaappummi. Unnuaannakkut itersarneqartarput, Aqqaluk Petersen oqarpoq.

Taanna paasiniaavigaarput, politiit nunatsinni suliassaat sakkortunerugaluartut, inatsisinik unioqqutitsinaveersaartariaqartut, akivorlu, tamanna ilumoorluinnartoq. Tassami tjenestemanditut sulivugut, tamannalu qitiutittorujussuuvarput. Politiit qulingiluassaat suliaminnut atatillugu unioqqutitsisarnerat qanoq isumaqarfigineraa aperaarput, akivorlu:

- Ajornartorsiut taanna aaqqiiviginiarsaraarput, akunnitsinni oqaloqatigiissutigiuarparput, soorlu sakkortuuliortoqarsimatillugu oqaloqatigiissutigisarlugu. Tarnit pissusaannik ilisimasalinnit Politiit Ilinniarfianni ilinniartinneqartarpugut. Suleqatitta ilaat oqaloqatiginnittartussatut aamma ilinniartinneqarput. Siunissami ammasuunissarput oqaloqatigiittuartarnissarpullu anguniarparput, Aqqaluk Petersen naggasiivoq.