Politiit ulapaarsimapput

Ilulissani sikumi qaleralinniat marluk qulimiguulimmik aaneqartariaqarsimapput, siku aalisarfigisaat kaanngarsimammat saavillunilu. Ilaqutaasut ernumalerlutik politiinut ippassaq saaffiginnipput, Ilulissat eqqaani siku nallulersimammat. Aalisartut qulimiguulimmit nassaarineqarlutik Ilulissiaanneqarput ajunngitsut, sikulu aalisarfigisaat nallorsimavoq saavissimallunilu, politimesteri Morten Nielsen oqaluttuarpoq.

Illoqarfiit annersaanni Nuummi aningaasarsiffik politiit sulinerannut malunnaateqarluarpoq. Qimarnguik, Nuup kommuneanit ingerlanneqartoq, arfininngormat qimarngusunit ulikkaavissimavoq, saaffiginnittunillu allanik tigusisinnaasimanatik. Angerlarsimaffinni eqqissiviilliornerit 13-it alakoortut 13-it aqqusinermi eqqissiviilliornerit sisamat aalakoorlunilu angerlarsimaffimmut iserniarsarisoq peersinneqartariaqarsimavoq, sapaatip akunnerata naanerani politiit nalunaarutaanni allassimavoq.

Arnaq 44-nik ukiulik angerlarsimaffimmini inooqatiminit annersarneqarpoq, arfininngornerup ullaassaani. Arnaq annersarneqarnermini ajoquserpoq, nakorsiartarfimmilu passunneqarluni. Angut annersaasoq sapaatip ullaassaani politiinit tigusarineqarpoq, killisiorneqarlunilu. Ullut aqqaneq marluk tigummigallagassangortinneqarpoq, politiit nalunaarusiaminni taama allapput.