Politiit: Ukiutoqaq ukiortaarlu annerusumik ajoquserfiunngilaq
Qaasuitsumi politiit pisortaat, Kasper Berthelsen KNR-imut oqarpoq, ataatsimut isigalugu pigaartut ulapissimanngitsut. Taamaattoq Aasianni ullaakkut tallimat missaani blokkini inissiat ilaat ikuallappoq ajoqusertoqaranili. Ilulissani angerlarsimaffinni eqqissiviilliortoqalaarsimavoq, nakuuserneq ataaseq ataatsimillu imigassartorsimalluni biilertoq tigusarineqarsimalluni.
Sermersuumi illoqarfiit amerlanerit pisoqarfiulaaraluarlutik eqqissimaffiusimapput. Nuummi eqqissiviilliortoqangaatsiarsimavoq. Ukiutoqqap unnukkuani Nuummi mittarfiup aqqutaani biili ajutoormat ilaasut ikiorserneqartariaqarsimapput annertunerusumilli ajutoortoqanngitsoq, illoqarfiillu sinnerini eqqissisimaffiusimasoq, Sermersuumi pigaartuusoq Brian Thomsen KNR-imut oqarpoq.
Kujataani Narsarmi Nanortalimmilu eqqissisimasumik ukiortaarsiorfiusimavoq, taamaattoq Qaqortumi politiit pigaartut qaatillutik ukiortaamilu ulaperujussuarsimapput, eqqissiviilliornerpassuarnullu orniguttariaqarsimallutik, Politiit pisortaat Bent Ole Kleist, Region kujataani pisortaq KNR-imut oqarpoq.
Region Qeqqani Maaniitsumi Kangerlussuarmilu ukiortaarsiorluartoqarsimavoq - taamaattoq Sisimiuni illuni eqqissiviilliortoqaalullunilu imigassartorsimallutik biilertut pingasut politiinit tigusarineqarsimasut, Qeqqani Politiit pisortaat, Johan Davidsen, KNR-imut oqarpoq.
