Politiit ujaasineq unitsippaat

24-nik ukiulik Søren Sørensen martsip 14-iat ujaarineqalerpoq. Ujaasineq kinguneqanngimmat unitsinneqarpoq.
Allattoq Noah Mølgaard
maajip 10-at 2012 08:57

Søren Sørensen kingullermik takuneqarpoq 14. marts nikallungasoq. Maanna Qeqqani politiit nalunaarput ujaasineq maajip qulingiluaat unitsinneqartoq.

- Snescooterit atorlugit ujaasineq ingerlassimagaluarparput. Aamma politiit angallataat gummibådilu atorlugit imaatigut ujaasisoqaraluarpoq Maniitsullu qeqertaani illuaqqat tamaasa misissorneqarlutik. Kisianni tamakku tamarmik kinguneqanngillat, Maniitsumi politeeqarfimmi ulluinnarni aqutsisoq Niels Tønnesen KNR-mut ilisimatitsivoq.

Eqqartuussiviup akuersineratigut Søren Sørensenip oqarasuaatai angallattakkat atorneqarsimanersut aamma misissorneqarsimagaluarput. Oqarasuaatilli angallattakkat marluk aqqanut nalunaarutigineqarsimasut piffissami pineqartumi atorneqarsimanngillat.